Famia ta crucial den e desaroyo di mundo henter. Famianan ta hunga un rol importante con bon muchanan ta desenvolve na scol, con bon nan ta haci nan trabou como adulto y con bon nan ta contribui na sociedad en general. Famianan ta e influencia di mas importante den e desaroyo di nos pais.
Lider di Partido MEP, sra Evelyn Wever-Croes, tabatin su prome evento y a dicidi di haci esaki pa famianan di Aruba. Riba un diadomingo trankil, famianan a yega pa asina pasa un dia familiar ameno hunto cu nos lider.
Despues di un aña escolar, lider di MEP a brinda nos muchanan un dia na unda nan por a pasa un rato den pool y goza nan dia sin tin mester di pensa riba scol of “huiswerk”. Mientras cu mayornan a haya e oportunidad pa saluda nos lider y pasa un rato ameno hunto cu demas bishitantenan na nos evento.
“Pa mi tabata un inmenso placer di a saluda tur e bishitantenan na Parke Arawa. Famia fuerte ta igual cu nacion fuerte. Famianan fuerte ta construi comunidadnan fuerte tambe. Ta pa esaki mes, mi prioridad den e proximo gobierno di MEP, ta pa brinda famianan miho oportunidadnan pa desaroya miho den nos comunidad. Hunto nos ta logra e cambio cu famianan y Aruba henter merece. Uni bo mes na e cambio cu mi persona y Partido MEP ta ofrece”, ta palabranan di Lider di MEP, sra Evelyn Wever-Croes.