Total di 30 ehecutivo di departamentonan di gobierno a completa e curso aki
ORANJESTAD – Departamento di Recurso Humano (DRH) a finalisa e siman aki e prome curso di ‘coaching’ na varios ehecutivo di diferente departamento di Gobierno. Minister di Finanza, Angel Bermudez ta sumamente satisfecho cu e resultado di e entrenamento, pues e guia aki ta esencial pa henter e aparato gubernamental y pa cada departamento por duna e servicio cu ta rekeri di nan na un manera mas optimal posibel.
E prome grupo ta consisti di aproximadamente 30 ehecutivo y directornan cu a sigui a curso pa un total di 20 ora. “Mi ta contento cu nan tabata dispuesto pa haci esaki. E ta un oportunidad cu Gobierno ta ofrece berdad pero cada un di e participantenan tambe mester ta dispuesto pa inverti nan tempo, energia y inteligencia den esaki”, asina e mandatario a expresa Diahuebs ultimo na e entrega di certificado.
Segun Minister Bermudez e iniciativa tras di e curso aki pa unifica e personal di cada departamento basa riba nan mision y vision pero tambe pa percura cu e ehecutivonan aki amplia nan experticio di SOVA, esta ‘sociale vaardigheden’. Esaki ta trece cu n’e cu nan lo siña con pa maneha personal, con ta comunica cu nan, con pa motiva nan, con pa yuda nan desaroya nan talento y capacidad lo mas hopi posibel, entre otro.
E mandatario ta splica cu e curso aki ta yuda tur ehecutivo riba tereno di ‘people management’ y cu sigur lo aporta grandemente pa yuda nan hiba un miho maneho como ehecutivo of director di nan departamento. Ademas e curso aki lo continua den futuro y tur cu ta labora den e aparato gubernamental por tuma contacto cu DRH y inscribi libremente.
E prome grupo cu a completa e curso aki a demostra hopi entusiasmo y a reacciona positivamente pa tur lo cual nan a siña den e ultimo simannan. Minister Bermudez ta sigur cu e resultado aki lo motiva demas coleganan pa forma parti di e proximo curso tambe.