Home Uncategorized Daniel Ferrara di Gianni’s Group durante Small Busines Event 2017 Percura pa...

Daniel Ferrara di Gianni’s Group durante Small Busines Event 2017 Percura pa tin tur ingrediente di exito ora cuminsa un negoshi

SHARE

ORANJESTAD, Aruba: Gianni’s Group mes a cuminsa manera un compania chikito y a crece te bira un “medium-sized company” na Aruba. Algun di e ingredientenan di exito sigur ta Bo atmosfera, Bo producto, Bo mercado, Bo ubicacion di negoshi, varios punto cu depende ki tipo di negoshi cu Bo ta haci, cu ta bira parti di bo receta pa ta exitoso, asina Daniel Ferrara, Gerente General di Gianni’s Group a bisa despues di a haci su presentacion diasabra mainta durante e Small Business Event.

 

“Mi a elabora tambe riba World Competition, cu ta encera pa NO copia of wak kico Bo bisiña na Aruba ta haci pa bay haci mesun cos. Purba di tin un aspecto unique riba mercado. Pa logra esey, ta bon pa enfoca mas riba e mercado global, check rond mundo kico ta pasando y aplica pa e mercado di Aruba”di acuerdo cu Ferrara.

 

Un di e recetanan di exito pa Gianni’s Group sin duda ta nan inversion den empleadonan. Si tin hende cu no ta sabi den bo organisacion y Bo wanta nan, den 5 pa 10 aña Bo tambe lo keda cu e limitacion di inteligencia ey den bo empresa. Si Bo kier tin hende sabi rond di Bo, sea Bo ta haya nan sabi pa siña Bo algo of Bo ta inverti den nan pa nan bira sabi y pa Bo ta superior riba bo competencia.

 

Por ultimo, a elabora tambe riba ki ora ta un bon momento pa sali for di negoshi. Ta conseha cu si mercado a cambia of Bo negoshi specifico no ta bayendo bon pa 3 of 4 aña largo, Bo mester pensa pa haci un cambio drastico den e mesun negoshi ey of e por ta un bon momento pa realisa cu e negoshi no ta funciona mas, e mercado a cambia of kico cu por a pasa y asina bay haci algo otro.

 

E conseho mas importante ta, cu antes ora Bo habri un negoshi, asina cu Bo ta un bon trahado, un trahado duro, specialmente si Bo ta dispuesto pa duna e miho 12 pa 16 oranan pa dia na Bo negoshi, di mes Bo lo ta exitoso. “Mi ta kere cu awendia mundo ta move hopi lihe, mercadonan a cambia masha lihe mes, cu ta rekeri cu Bo mester haci huiswerk cu Bo cabes. Bo mester studia e mercado, e finansanan, Bo mester sa un tiki di e negoshi cu Bo ta bay haci, prome cu Bo cuminsa cune. Esey ta e gran diferencia compara cu antes, unda djis trabou duro so tabata suficiente pa por a garantisa exito y progreso”, asina Daniel Ferrara a termina bisando.