ORANJESTAD, Aruba: Leslie Escobar, hurista y hefe suplente di Seccion Asuntonan Huridico & Registracion di Cuido na Departamento di Salud Publico (DVG) ta haci un yamada na tur instancia/dunado di cuido na Aruba pa registra.
Gobierno tin un rol importante pa controla y stimula e calidad di cuido di salud en general y e calidad di dunadornan di cuido en particular. Den cuadro di mehoracion di calidad di cuido y pa garantisa cuido di calidad, a bin cu e Ley di Calidad den Cuido cu ta na vigor for di januari 2017. E ley aki ta crea obligacion legal nobo, entre otro e obligacion pa instancia/dunado di cuido medico wordo registra.
E ley ta defini tres grupo cu ta wordo considera di ta instancia di cuido:
- Persona natural of un persona huridico cu tin un instancia
- Persona natural of un persona huridico cu hunto ta forma un instancia
- Un dunado di cuido
Con pa registra?
Tur instancia of dunado di cuido lo haya un e-mail for di Departamento di Salud Publico (DVG) cu un formulario di inscripcion official. Esaki mester wordo yena y manda bek pa Departamento di Salud Publico cu demas documento via email: [email protected]
Si como instancia bo no a ricibi ningun e-mail pa registra, Departamento di Salud Publico ta pidi bo encarecidamento pa tuma contacto pa haci esaki ainda. E instancianan di cuido cu mester registra ta por ehempel: hospital, botica, instituto of instancia medico y paramedico, tur dokter di cas y specialista, laboratorio, oficina di dentista of cuido dental. Si ta un persona individual cu ta duna cuido como “zelfstandige”, tambe tin cu registra.
E ley aki ta na bienestar di cuido general y door di registra bo mes Departamento di Salud Publico lo por tin un bista mas amplio riba calidad di cuido na Aruba.
Pa cualkier pregunta of mas informacion por yama DVG na number di telefon 5224200.