Loganville, Georgia, Estados Unidos- Diahuebs mainta algo prome cu 5’or, Polis di Gwinnet County ta wordo manda na un cas riba Emory Lane na Loganville, despues cu un dama ta yama 911 bisando cu varios personanan a wordo hinka na e adres aki.
Na yegada di e agentenan nan ta bin topa cu un situacion hopi horendo, den e cas tabata tin 4 mucha chikito y un homber adulto morto, e di cinco mucha tabata bibo y cu heridanan hopi serio, mesora e ta wordo transporta pa hospital. E hefe di polis a bisa cu nunca e lo por a spera di topa algo horendo asina.
E dama kende ta casa di e victima masculino y ta mama di e muchanan cu a wordo haya morto den e cas, ta e sospechoso principal den e caso aki.
Team di recherche ta trahando riba e caso aki pa identifica e victimanan, nan edadnan y tambe kiko lo por a conduci e mama pa haci algo asina aki cu su propio yiunan y casa.