ORANJESTAD – Dia 4 di juli 2017 señor John Mahboeb di Interpoint hunto cu Directora di DIMAS señora Kathy Ruiz-Paskel a haci entrega oficial di certificadonan di e curso basico di e Maneho di Admision na e trahadonan di DIMAS.
E curso basico pa e maneho di admision a wordo duna den e lunanan di maart te cu juni 2017 na e empleadonan di DIMAS cu tin e responsbilidad pa traha decision riba peticionnan pa un permiso di estadia.
E empleadonan cu ta atende publico y recepcionistanan tambe a ricibi curso separa enfocando riba e abilidadnan cu mester tin of adkiri pa garantisa e amabilidad con pa trata cu cliente di DIMAS na un manera mas servicial. A haci uzo di e metodo di duna feedback riba videonan tuma for di practica na DIMAS mes.
Ambos curso a finalisa cu un prueba (eindtoets) final.
E cursonan aki a wordo prepara y facilita door di, señor Roberto Uding (Interpoint/VKA) conhunto cu señora Jacqueline Harewoord (DIMAS)
Durante di e programa di capacitacion interno aki, e empleadonan di DIMAS a firma tambe un contrato di compromiso. Den e contrato di compromiso e empleadonan di DIMAS a haci un compromiso di con nan ta bay sigui traha den e organisacion. E compromisonan den e contrato aki a wordo formula dor di e trahadornan mes. Compromiso manera amabilidad pa cu cliente, tuma decisionnan corecto, duna y ricibi feedback na otro, ta algun di e compromisonan cu e trahadonan a haci.
Na final di e ceremonia di entrega di certificadonan, un version completo di e contrato di compromiso a ser entrega door di empleadonan na e Director di DIMAS, señora mr. K. Ruiz-Paskel y na Director interino, señor Mario Wever.
DIMAS ta hopi contento cu e progreso unda actualmente mas cu 90% di e peticionnan haci na 2017 a haya un decision dentro di e termino di 12 siman. Tambe a logra atende casi tur peticion atrasa cu ta data di 2016.