ORANJESTAD – Diaranson atardi Minister President Mike Eman a ricibi e hoben di 18 aña y su mayornan den su oficina na Cocolishi pa asina expresa su pabien y esun di pueblo di Aruba pa e exito alcansa. Durante combersacion cu e hoben naci na Aruba, pero di descendencia Peruano, e mandatario a desea Tapia hopi exito den su estudionan avansa na TU Delft na Hulanda, pero tambe a haci un peticion ferviente pa, un bes completa, regresa Aruba y aporta na su isla. Esaki ta un deseo cu Tapia mes ta comparti como cu e ta sinti un responsabilidad moral cu nos isla pa tur e oportunidad y cariño cu Aruba a brinda su mayornan y e mes durante ultimo 25 aña.
Tapia su meta ta pa bira un Ingeniero Electrico y e tin un bon base pa esaki cu mas di un 10 pa e materianan di Wiskunde A y B. Despues di un tropieso den su prome CP na Colegio Arubano, Tapia a haya un detereminacion y awendia ta confesa di ta encanta cu tur loke ta ciencia y tecnologia. “Mi stima matematica y ciencia en general pasobra mi ta kere cu nan ta e estudionan di bida; danki na ciencia nos por compronde bida. Pa mi fisica, kimica, biologia tur ta hopi importante ta siña nos di unda nos ta bin y unda nos ta bay, con bida ta hinca den otro.”
E hoben ta consciente y satisfecho di e vision cu Gabinete Mike Eman tin pa Aruba den e ramo di tecnologia y sostenibilidad; como tambe di e oportunidadnan cu esaki ta nifica p’e y pa otronan den futuro. “Un gobierno cu ta inverti den educacion, ta inverti den e futuro di su pais. Mi ta kere cu ciencia tecnologia, innovacion y matematica ta e terenonan mas importante awo ya cu nos tin hopi problema ambiental. Nos mester yuda nos planeta, nos mester restaura e daño cu nos a haci y esaki nos por haci solamente cu ayudo di ciencia,” Tapia ta splica.
“E hoben Roderick Tapia tin un cijfelijst impresionante,” Prome Minister Eman a bisa den loke el a describi como momento special di por a ricibi e y su mayornan caminda a hiba un combersacion ameno, pero tambe cu ta duna nos e confiansa cu nos sistema di enseñansa, pa e retonan cu e tin, ta un sistema cu ta produci resultadonan sumamente ehemplar y cu nos por ta orguyoso di dje.”