Home » Grupo di Trio femenino a clasifica pe Weganan Centro Americano y Caribe Baranquilla 2018

Grupo di Trio femenino a clasifica pe Weganan Centro Americano y Caribe Baranquilla 2018

by sxm
0 comment 93 views

ORANJESTAD, Aruba – Seleccion Nacional di Bowling a biaha pa Guatemala y a participa na e torneo di Confederacion di Bowling Centro Americano y Caribe dianan 24 di juni pa 2 di Juli 2017. E torneo aki tabata importante pasobra e miho 10 paisnan ta clasifica directamente pe Weganan Centro Americano y Caribe Baranquilla 2018. A participa un total di 17 pais di Centro Americano y Caribe. Tanto seleccion femenino y masculino a logra clasifica directamente pa Weganan CAC 2018.

E seleccion nacional di Aruba tabata forma pa Jason Odor, Yannick Roos, Renald Thiel, Errol Brown, Oswaldo Dijkhoff y Valentino Jacobs den categoria masculino, mientras categoria femenino tabata forma pa Kamilah Dammers-Nadal, Thashaina Seraus, Jeadine Luidens, Shakaina Querrero, Giaira Arends y Betiza Koolman. Hunto cu e hungadonan di bowling a bay e delegado y coachnan Alexander Biesum y Rita Lopez-Henriquez y assistent Anthony Tjin Kon Fat. Tur dos team den diferente categoria a duna tur loke ta por den condicionnan dificil cu tabata un poco sorpresa pe hungadonan di bowling.

E meta principal di e seleccion nacional di bowling tabata pa clasifica pe weganan di Centro Americano y del Caribe. “Nos tin medaya di oro pa defende, pero nos kier a clasifica”, Kamilah Dammers-Nadal a indica orguyosamente. Nan a competi den categorianan di single y double den e prome 2 dia, pero nan no a bay mucho bon. Durante e di 3 dia di competencia e trio a cera cabes y a bataya fuerte, unda cu nan a gana paisnan grandi. E paisnan aki a presenta na e torneo cu teamnan di hungadonan profesional, pero asina mes e trio a percura pa yega te final y a logra bay cu medaya.

Jeadine Luidens tabata contento di a logra e medaya di plata cu el a gana den categoria di Trios. Den a categoria di Trios el a competi cu Kamilah Dammers-Nadal y Thashaina Seraus. “E no tabata asina facil, pero hunto semper nos a logra y nos a struggle na caminda. Nos a bin bek y nos a bay pe”, Jeadine Luidens a bisa, kende tabata contento di nan logro. Kamilah Dammers-Nadal, Thashaina Seraus y Jeadine Luidens ta competi hunto pa algun aña caba. Tambe tanto Kamilah Dammers y Thashaina Seraus a logra cay entre e miho 8 di nos region. Pa clasificacion pe Weganan Centro Americano del Caribe Baranquilla 2018, a suma hunto e puntonan di tur evento di cada atleta cu nan a logra.

Un pabien ta bay na tur atleta cu a logra clasifica. Aruba lo bay tin 12 atleta pa e siguiente Weganan di Centro Americano y del Caribe. ARBAS ta gradici Minister di Salud Publico, Cuido di Nos Grandinan y Deporte, Dr. Carlos “Alex” Schwengle y su Ministerio pa su atencion pa cu deporte. Un danki grandi ta bay na Comite Olimpico, Comision di Subsidio y na CEMEDAR cu ta mustrando un profesionalismo grandi ariba tereno di deporte en general. Minister Schwengle tabata contento di mira con leu Aruba a yega den bowling y a desea nan pabien y exito den Weganan Centro Americano y Caribe Baranquilla 2018.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio