Home Uncategorized Minister Sevinger: “Tanto Green Corridor como Watty Vos Boulevard ta mehora calidad...

Minister Sevinger: “Tanto Green Corridor como Watty Vos Boulevard ta mehora calidad di bida y siguridad den trafico”

SHARE

ORANJESTAD – Na momento cu Gabinete Mike Eman II ta evalua un proyecto, esaki ta wordo haci basa riba con, den e caso aki, por mehora e fluho di trafico. Pero tambe ta evalua kico e por nifica pa e ciudadanonan di Aruba, pa nan calidad di bida cu definitivamente ta mehora.  

Den e ceremonia di dialuna mainta, unda a duna inicio oficial di e prome rotonde grandi di Watty Vos Boulevard na Cumana, Minister di Infrastructura Benny Sevinger a papia di e influencia positivo cu e dos proyectonan di infrastructura tin pa e habitantenan di Aruba. “Loke ta masha importante den tur e proyectonan menciona,” Sevinger a bisa, “ ta cu nan tin tres aspecto masha importante.” Uno ta e parti social, unda cu ta papia di algo cu ta encera algo mas cu un bunita caretera pa Aruba. E ta un proyecto cu ta mehora calidad di bida di e ciudadanonan den tur aspecto. Tur ciudadano di Aruba ta bay haci uzo di e Green Corridor y Watty Vos Boulevard, cualnan lo percura pa un miho fluho di e trafico. E rotonde artificial na Cumana ya caba a reduci e tempo cu automobilistanan ta keda pega den e area aki. “Ya caba aki e calidad di bida di nos ciudadanonan a bay padilanti.” Tin e aspecto economico cu lo wordo mehora, sigur e parti entre pariba y pabou di brug. E di tres aspecto, ta cu e cambio aki y creacion di Watty Vos Boulevard sigur lo percura pa un mehoracion den siguridad di trafico. Ambos ta bay trece siguridad den trafico, unda autonan cu pasa otro no ta bay confronta cu trafico contrario mas. Pero tambe e rotondenan cu a wordo construi den e ultimo añanan y verkeersplateau a contribui na siguridad den trafico.

Cu e cambionan den Infrastructura ta dunando resultado positivo ta demostra den e hecho cu ya caba Aruba ta mey-mey di aña y no tabatin accidente fatal. “Ban spera cu Aruba por yega fin di aña y no tin ningun fatalidad den trafico,” e mandatario a bisa, haciendo apelacion na tur automobilista pa maneha cu cautela respetando tur usuario di careteranan di Aruba.

Pa finalisa, el a resumi tur loke a wordo haci door di e Gobierno cu e ta forma parti di dje. “E Gobierno aki a traha hopi riba infrastructura. Nos a haci hopi den e ultimo 7 añanan, careteranan nobo, verkeersplateau, camindanan nobo, sistemanan di desague. Pero e trabou no a caba ainda. E trabou apenas a cuminsa, nos tin cu sigui lora manga di camisa pa sigui construi riba un miho porvenir pa nos ciudadanonan y futuro generacionnan. Aruba merece e cambionan pa un miho porvenir.”