Home Uncategorized Inicio di construccion di rotonde Cumana riba Watty Vos Boulevard

Inicio di construccion di rotonde Cumana riba Watty Vos Boulevard

SHARE

Sectornan di acuerdo con infrastructura ta mehora economia y calidad di bida

ORANJESTAD – Dialuna mainta automobilistanan pasando riba e rotonde provisional di Cumana a tuma nota di tent y podium riba e tereno panort. Aki directiva y profesionalnan di Departamento di Obranan Publico (DOW) a ricibi Ministernan, Parlamentarionan y representante di varios sector di nos isla. E ocasion tabata e inicio di construccion di e rotonde cu ta forma parti di e prome fase di e proyecto Watty Vos Boulevard. Despues di a hiba palabra, Prome Minister Mike Eman a subi den mashin y a realisa e groundbreaking bou mirada di colega di infrastructra Benny Sevinger, Joao Campos Forte Managing Director di Mota-Engil y director di DOW, ing. Marlon Croes.

Gabinete Mike Eman a indica e satisfaccion di por ehecuta e plan aki despues di a pasa 40 aña den lachi di diferente gobierno y con e ta mehora e calidad di bida y economia di e isla, sectornan comercial y turistico a manifesta di ta di acuerdo cu e ponencia aki y a argumenta nan opinion. Director di ATA Ronella Tjin Asjoe-Croes a expresa su palabranan di pabien bisando cu “Esaki sigur ta un mehoracion pa e calidad di bida di esnan cu ta biba akinan, incluyendo mi persona, pero sigur ta un mehoracion y algo esencial y necesario pa sigui sostene y mehora e experiencia di e bishitante, tambe di e trahador di e sector y esnan cu ta haci comercio.”

E ta algo grandi pa nos famia; cu di un manera of otro ta contribuyendo tambe cu e mobilidad, sostenibilidad y economia di pais Aruba. Eduard Vos subrino y VP di Fundacion Watty Vos a splica cu e Avenida cu ta carga nomber di e difunto politico ta crusa na altura di e rotonde cu Caya G.F. Betico Croes kende hunto cu Vos a lanta partido MEP y tabata bon amigo semper. Na e otro extremo, e caminda ta finalisa na crusada di Fatum cu Juancho  Yrausquin Boulevard cu pa Watty Vos tabata un idolo y por ultimo, Gabinete Mike Eman cu AVP den gobierno ta ehecutando e proyecto cual ta un orguyo enorme.

Parlamentario Lorna Varlack como President di Comision di Infrastructura den Parlamento a comenta cu e ehecucion di e proyecto ta cumplimento di e deseo di pueblo. “Nos a scucha nos hendenan conta con trafico ta pega; un di e puntonan esencial cu nan ta papia di dje. Watty Vos Boulevard ta bay alivia trafico y eleva e calidad di bida y ta brinda e ciudadano mas tempo pa pasa cu su famia.” E situacion di trafico ta algo cu director di DOW ta confirma cu cifranan cu el a comparti e mainta aki splicando cu durante ultimo 10 aña e cantidad di auto circulando riba nos careteranan a triplica bayendo di 25 mil pa 77 mil vehiculo.

Croes ta gradici su coleganan na DOW ya cu nan tin un trabou y responsabilidad grandi di ehecuta un di e proyectonan di mas grandi di infrastructura den e ultimo 50 añanan. E ta sinti orguyoso di por conta cu un bon team y cu bon cooperacion pa logra e metanan, algo cu a bin ta haci for di 2010 cu ta trahando cu Private Public Partnership (PPP). E director di DOW tambe a sigui pone enfasis riba e necesidad di comprension di parti di automobilistanan mientras cu e trabounan ta andando y cu di nan parti, ta haciendo tur cos posibel pa e molester ta minimo.