ORANJESTAD – Desde inicio di proyecto Green Corridor bou guia di ODINSA, ing. Carlos Zubietta ta e persona encarga pa supervisa e trabou di e proyecto na Aruba. Awo ta den e etapa final di culminacion di e trabou, asfaltando e brug nobo di Balashi. E proyecto grandi aki por a cana un bon caminda danki na e bon cooperacion y asistencia cu semper a haya di expertonan di DOW y apoyo di Prome Minister Mike Eman y Minister di Infrastructura Benny Sevinger, Ingeniero Zubietta a comenta na momento cu a cuminsa asfalta e caminda cu ta pasa riba brug.
Manera trabou ta moviendo, e ta kere cu denter di poco ta haci e testnan necesario riba e brug pa despues entrega e trabou aki na Gobierno den luna di augustus. Na momento cu esaki tuma luga, e area rond di e brug tambe ta wordo embeyeci, manera a wordo palabra. Despues ta sigui cu e parti di e brug bieu (esun cu ta den uzo awo) cu ta wordo converti den un Linear Park pa entretenimento familiar. Di otro banda ya caba a cuminsa cu e proyecto di refosteracion di e parti di mangrovenan. Tin un palabracion pa planta riba henter e proyecto 4600 mata. No ta tarda mucho mas cu ta cuminsa cu plantacion di mata riba henter e ruta di Pos Chiquito y esun di fietspad riba Green Corridor.
Ingeniero Zubietta a bisa di ta sinti un orguyo grandi di ta envolvi den e proyecto di Green Corridor. E proyecto aki, el a bisa, desde inicio tabata un reto grandi y “e ta un orguyo tanto personal como di e empresa di por a participa y hib’e na su final. E cambio cu a wordo logra ta algo importante y poco poco e ciudadano ta realisa e importancia pa tin e proyecto aki pa beneficio di comunidad, tanto automobilistanan como e habitantenan cu por disfruta di e areanan di recreacion, manera e parkenan y areanan pa cana.”