Home Uncategorized Lider di Partido POR, Otmar Oduber: Dr. Dellanire Maduro como hoben y...

Lider di Partido POR, Otmar Oduber: Dr. Dellanire Maduro como hoben y profesional lo dedica su mes na su Pais y cuido medico

SHARE

Ayeratardi Pueblo Orguyoso y Respeta (POR) a lansa otro tremendo candidato riba nan lista cu ta keda crece casi tur siman. Miembronan di POR, famia y amistadnan tabata presente na momento cu a lansa e candidato hoben, educa y fuerte esta, Dr. Dellanire Maduro. Henter team di POR ta duna bon bini na Dr. Maduro cu a bisa cu ta cla y dedica pa traha pa mehora calidad di bida cu enfoke special riba nos cuido medico.

Na diferente ocasion lider di POR Otmar Oduber a mustra riba e compromiso cu tin pa mehora e situacion di cuido medico aki na Aruba cu ta un preocupacion grandi den nos comunidad. Por mira esaki bek den e “Plan di Accion” y tambe e vision di miembro di e partido Eromil Bakmeyer cu ta traha mas cu 10 aña den e area aki. Contrario na locual cu tin actualmente, partido POR kier haci mucho mas riba e tereno di prevencion y educacion/conscientisacion di nos hendenan. Na diferente ocasion sr. Oduber hunto cu su colega Andin Bikker a mustra su preocupacion tambe pa loke ta e realidad dificil di nos hobennan dokter cu studia den region cu no ta wordo reconoci na Aruba. Sr. Oduber a compremete cu POR lo cambia esaki ora cu POR ta den gobernacion. Dr. Maduro cu awo ta miembro di POR tambe ta un Dr. cu no por ehecuta su funcion pa motibo cu el a studia den region. Dr. Maduro tambe ta comparti e mesun vision cu POR tin pa loke ta prevencion y a indica cu pa mantene hende saludabel ta e miho remedi. E ta para pa prevencion a base di educacion nutricional, control preventivo y tratementonan preventivo. Esakinan no solamente ta evita malesa, pero tambe tin ventaha financiero pa AZV.

Mehoracion den e sistema pa hende haya cita cerca dokter, terapeuta etc. creando e ora un mercado medico mas competitivo cu menos tempo di espera. Otro enfokenan di Dr. Maduro ta encera: Restructuracion di Cuido Medico General y e Economia/Industria Medico.
Di e forma aki POR ta mustra un bes mas cu ta comprometi na trece mehoracion den e sistema di cuido medico aki na Aruba cu personanan profesional cu vision moderno. Cuido Medico, mescos cu educacion y hustica, ta un di e problemanan/preocupacionnan principal di nos pueblo.