Home Uncategorized Awor no ta Santana di cacho so mas, grupo indocumenta ta subi...

Awor no ta Santana di cacho so mas, grupo indocumenta ta subi tera altura di Costa Linda

SHARE

Eagle – Diahuebs marduga pa mas o menos 2:20 polis a wordo poni na altura cu entre Bucuti cu Costa Linda, un boto lo a baha varios persona. Esaki tawata informacion haya for di un security guard, cu tawata basta spanta y a bay sconde.

Ela conta polis cu den careda di 2:15 ela mira un boto, cu mas o menos 5 pa 6 persona ariba dje, momento cu nan a subi tera ela scucha stem di un mucha entre e personanan. Aki ta caminda cu e no por a wak nada mas pa motibo cu ela bay sconde.

Un cos e sa cu e grupo aki a bay direccion nort ariba Eagle beach. Polis a tira bista caminda e grupo lo a baha, pero no ta haya nada particular.

ALTURA DI OCEANIA
Aki banda polis ta topa cu un otro homber y e tambe a confirma na e patruya cu ela wak e boto y cu nan tawata tin un luz chikito abordo. Door di e luz ela wak e boto, si no tawata tin ningun luz visibel e boto aki ta core completamente cerca di costa sin wordo detecta.

Patruya a notifica central di polis y na nan turno ta bisa e patruya cu Kustwacht ta den vecindario.

ARASHI
Dialuna mainta den careda di 6’or, tambe nan a subi tera y a laga life vest y pañanan cu a wordo cambia atras. Despues di esey un auto color preto chikito tawata warda, caminda cu nan a subi esaki y bay di e sitio.

Manera nos a premira, e isla ta sumamente vulnerabel pa ken cu ta drenta con cu ta, via nos costanan.
Di e manera aki arma y droga tambe ta drenta facilmente.

Aruba mester di ekiponan sofistica y tambe un team specialisa pa vigila nos costanan.

”Paso por yega un dia cu un grupo arma y bon entrena subi tera y comete algo cu nos niun no kier ni imagina”.