Home Uncategorized Ley di “Kinderopvang” aproba unanimamente den Parlamento

Ley di “Kinderopvang” aproba unanimamente den Parlamento

SHARE

ORANJESTAD, Aruba – Dia 5 di juni ultimo Parlamento di Aruba a aproba unanimamente e “Landsverordening kinderopvang” cu Minister di Enseñansa, Michelle Hooyboer-Winklaar, a presenta. Tur miembro di Parlamento a mira e importancia di e ley aki cu ta proteha tur mucha di zero te cu mas o menos diesdos aña cu ta bay un pasadia, crèche, speelschool of un Traimerdia.

Ta un momento historico pa motibo cu for di aña 1988 ta trahando pa yega na un ley pa reglamenta cuido y guia di mucha. For di hopi aña tin preocupacion den nos comunidad pa e calidad di cuido y guia di mucha chikito. Nos muchanan tin derecho pa lanta y wordo educa den un ambiente sigur, tanto na cas como pafo di cas. Awor cu e ley ta aproba Gobierno por garantisa cu tur centro di cuido y guia di mucha na Aruba ta ofrece un calidad minimo cu ta responsabel y ta garantisa proteccion di e muchanan.

Gobierno lo stipula un fecha cu e ley ta drenta na vigor. Ta premira cu esaki lo bira entrante juli 2018 pa asina por traha riba tur e preparacionnan y informa tur e centronan existente di tur e exigencianan y proceduranan. Na luna di augustus lo tin encuentronan pa tur doño di centronan di cuido y guia di mucha caminda lo informa nan di e contenido di e ley y e procesonan cu ta cuminsa cana awor. E punto di salida ta cu ta bay guia e centronan existente pa nan por cumpli cu e diferente normanan di calidad y asina ofrece un ambiente pedagogico responsabel y sigur.

E ley di kinderopvang ta considera un “kaderwet” unda ta stipula cu esnan cu ta opera un centro di cuido y guia di mucha mester tin un permiso y mester cumpli cu diferente norma di e calidad minimo. Esaki ta duna e doñonan di e centronan instrumento y guia pa por ofrece e calidad minimo cu ta exigi.

Norma di calidad cu e ley ta menciona ta entre otro e nivel minimo di enseñansa cu un lider mester tin (LBO) y cu un cabesante mester tin (MBO) y e cantidad di mucha riba e cantidad di lider. Por ehempel un maximo 6 mucha entre edad di 6 siman te 1 aña; maximo 10 mucha entre edad di 1 aña te 2 aña; maximo 12 mucha entre edad di 2 aña te 3 aña; maximo 13 mucha entre edad di 3 aña te cu 4 aña; maximo 14 mucha entre edad di 4 aña te cu 6 aña y maximo 16 mucha di 6 aña te cu e edad cu nan tin den 6de klas di scol basico.

Si ta trata di grupo di edad mixto, e ta e averahe di e categorianan corespondiente. Otro norma di calidad ta por ehempel, cu un lider mester tin un certificado di prome asistencia (EHBO) y un comprobante di buena conducta. Tambe tin normanan di calidad cu tin di haber cu higiena y siguridad.

Lo bay introduci e ley den fase pa asina tene cuenta cu e centronan existente y duna nan e oportunidad y suficiente tempo pa gradualmente cumpli cu tur rekisito. Pa e centronan existente lo tin periodonan di transito pa e diferente normanan di calidad. Pero den e proceso aki e enfasis Semper lo keda riba calidad y siguridad cu cada mucha merece. Loke ta e meta principal di e ley di kinderopvang.

Minister Hooyboer-Winklaar ta gradici tur instancia cu a contribui den pasado y awor cu nan experticio den realisacion di e ley di kinderopvang. Cu realisacion di e ley di kinderopvang mayornan lo bay haya e trankilidad cu nan yiunan ta ricibi cuido y guia di calidad. Y e doñonan di e diferente tiponan di cuido y guia di mucha cu tur tempo a haci nan trabou cu tur bon intencion porfin ta haya liñanan di guia y exigencianan cu nan mester tene nan mes na dje.