Home Uncategorized Un total di 7 detenido a ricibi nan diploma na KIA

Un total di 7 detenido a ricibi nan diploma na KIA

SHARE

ORANJESTAD, Aruba – Un grupo di 7 detenido a logra hal nan diploma na KIA prome cu nan sali y pa cu esaki e instituto ta sumamente contento. Esaki ta bin pasobra no solamente e personal di KIA pero cu cooperacion di personanan di afo a hinca proyecto y cursonan den otro cu nan por a sigui cu nan desaroyo.

Director di KiA, Rocco Tjon, ta orguyoso di e trahadonan di KIA, kendenan a demostra di tin union. E trahadonan kier a traha hunto y pa cu esaki a logra resultado positivo cu 7 detenido a logra nan diploma. E diploma cu e detenidonan a logra ta di calidad, pasobra esaki tabatin supervision di Enseñansa pa Empleo, Oduber Contractor y EPB, Rocco Tjon e expresa orguyosamente. “Mi ta hopi orguyoso no solamente di e trahadonan, pero tambe di e detenidonan cu di nan banda tambe a duna di nan mes pa cumpli cu tur rekisito”, director di KIA a expresa.

Durante e entregamento di diploma por a presencia cu un persona a haci soldeer, cual ta un curso cu tabata contene e parti practica pero tambe e parti teoria. Trahado Social y Relacionista Publico di KIA, Consuela Cameron a splica cu e curso a cana fenomenal y a dura 3 luna total pa asina e detenidonan por a logra practica kico nan a siña. “Bunita di e proyecto ta cu e no ta solamente soldeer, pero e tin un continuacion su tras”, Consuela Cameron indica. Despues cu e grupo a logra obtene nan diploma, nan por haci stage den e departamento di werkplaats unda cu tin diferente material cu nan por traha. Nan por haci uzo di tur loke nan a siña y nan por yuda KIA bek. Loke e detenidonan traha comunidad por cumpra.

E studiantenan ta contento y hopi entusiasma, pasobra ta lubida cu e detenidonan ta ser humano. Nan tin cierto necesidad y a kita nan libertad, pero esey no ta kita cu ainda e detenidonan mester keda corigi den diferente forma. E detenidonan ta ricibi un oportunidad nobo. KIA ta ricibi contribucion y ta contento cu esaki. Nan a ricibi contribucion di EPB, Oduber Contractor cu a yuda sostene e proyecto. E curso ta bay segun e criteria di Enseñansa pa Empleo. KIA ta purba di integra diferente curso di calidad, pero e cooperacion ta hopi valioso.

Wilfrido Dubero tabata encarga pa a duna e detenidonan e les di soldeer y desde aña pasa na October nan a cuminsa cu e curso. A cuminsa cu e parti di teoria di pilot proyect prome, pero prome cu por a cuminsa cu e curso Rocco Tjon a acerca Wilfrido Dubero y pidi pe duna les na KIA den un werkplaats cu no tabata den uzo. Asina aki Wilfrido Dubero a cuminsa duna e les na e detenidonan, pero e les di practica a cuminsa na April. Wilfrido Dubero a recorda cu el a cuminsa den un area cu no tabata tin material pa traha y poco, poco hunto cu 1 preso nan a cuminsa drecha e werkplaats. Tur dia e presonan tabata presenta pa haya les y Wilfrido Dubero ta contento cu nan a logra haya nan diploma. Tambe e ta contento di con bon e cooperacion tabata cu e trahadonan di KIA.