Home Uncategorized Empleadonan ta entusiasma cu e programa “Meta Fit”

Empleadonan ta entusiasma cu e programa “Meta Fit”

SHARE

ORANJESTAD, Aruba – Recientemente MetaCorp a inicia nan programa di caminata “MetaFit” pa su empleadonan. E programa tin un duracion di 7 siman unda tur empleado ta haya oportunidad di cana diaranson y diasabra, asina Javier Lampe di MetaCorp a remarca.

E empleadonan ta cana diaranson atardi 6:00 PM y diasabra mainta 6:00 AM.

E programa a wordu prepara pa empleado nan por termina e evento final cual lo tuma luga dia 2 di Juli. Tur empleado cu kier participa por cana 10 KM of 15 KM. E evento final tambe lo bay ta habri pa publico. Esaki ta parti di e programa di salud y movecion cu MetaCorp ta organisa tur aña.

E evento di bowling tabata prome cu a inicia y awo ta sigui cu e eventonan di caminata y despues lo sigui cu otro eventonan pe resto di aña, cu ta bike ride y por ta algun otro evento cu lo bay tuma luga na caminda.

E entusiasmo bou di e empleadonan ta basta halto. Den e ultimo añanan e deporte di canamento y coremento a bira basta popular. “Sigur e ta un programa cu tur aña e empleadonan ta spera pe temporada aki yega pa asina nan cuminsa participa den e evento”, Javier Lampe a remarca. Hopi di nan tin e como meta pa nan mes cu sea nan ta participa na e evento pa por baha peso, move mas of combin’e cu otro actividad afo di canamento y coremento.

Un tiki mas di e historia di MetaCorp:

MetaCorp ta existi desde aña 1920 caba den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den ATCO Concrete Products y Ecotech. Despues di segunda guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi.

MetaCorp ta e empresa comercial mas bieu na Aruba y pronto ta cumpli 100 aña. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talentonan manera Eddie de Veer, Robert Carrasquero y Guus Slabbekoorn na cabes di e compania.