Home Uncategorized Amy Richards di Partido MEP: Hobennan, sea critico! E debe halto...

Amy Richards di Partido MEP: Hobennan, sea critico! E debe halto cu nos lo mester paga no ta parti di un bon gobernacion

SHARE

Observando nos debe nacional di pais Aruba, cu ta na 84% di nos GDP, un persona lo por spera di mira progreso den un escala grandi! Sinembargo, bao di e maneho di gobierno di AVP, nos por mira cu criminalidad ta creciendo, problemanan social ta aumentando y desempleo bao di nos hobennan ta sumamente halto. Ora cu tin bon gobernacion, bo no lo mester introduci medida tras di medida pa asina e comunidad sufri pa e decisionnan di un gobierno iresponsabel. Con ta posibel cu e mandatarionan cu a scoge conscientemente di kita placa for di nos grandinan, huerfanonan y esnan di mas vulnerabel den nos comunidad, ta grita cu “Cos ta bon!”.  Kisas pa nan circulo di Amistad cos ta tremendo, mientras tanto e mayoria di e comunidad ta lucha pa por bay dilanti.

Sea critico di tur locual bo tende!
Ora un persona ta declara “Mi ta wak unda mi placa ta bay..”, ta simplemente un argumento bashi pa por tapa tur e corupcion y abuso di poder cu nos ta mirando pa e ultimo 8 añanan aki. A yega ora pa berdaderamente mira unda nos placa ta bay. Esaki lo sosode, una bes partido MEP drenta gobernacion.  E ora, Aruba lo conoce un maneho responsabel, transparente y progresivo pa nos comunidad.

Falta di prioridad
Canando den e barionan rond Aruba, bo lo pensa cu e gobierno actual ta doño di companianan di construccion y ta goberna door di pega bloki y cement so. Cu partido MEP den gobierno, e inversionnan lo bay bek directamente den e comunidad. Door di crea un plataforma di Arte den nos comunidad, lo ofrece oportunidadnan nobo pa nos muchanan y hobennan. Lo combati criminalidad cu man duro, pa asina trece bek orden y respet. Lo introduci un control riguroso di prijsnan den supermercadonan, pa percura pa baha e costo di bida. Lo inverti den nos scolnan y mehora e calidad di enseñansa pa percura cu nos muchanan por tin un bon futuro. E ora SI Aruba lo por bisa “Awo mi ta wak unda mi placa ta bay!”.