Home Uncategorized Hopi informacion duna durante e anochi informativo Studiantenan ta sinti cu ta...

Hopi informacion duna durante e anochi informativo Studiantenan ta sinti cu ta miho prepara pa bay Hulanda

SHARE

ORANJESTAD, Aruba-: Diamars anochi hopi studiante hunto cu nan mayor a presenta na e anochi informativo cu Ministerio di Enseñansa a organisa, unda cu nan a ricibi diferente informacion di Aruba Lening pero tambe a haya presentacion di e hoben di Corsou Eldrion Regina. Durante e anochi aki tanto e studiantenan como e mayornan tabata haci diferente pregunta riba puntonan cu pa nan tabata sumamente importante.

 

Studiante Angele Jansen a haya cu e anochi informativo a bay bon y nan a ricibi hopi informacion, aunke cu e mes tabata sa basta informacion. “Pa mi e tabata pa djis mi confirma sigur tur loke mi sa caba”, Angele Jansen a comenta. Angele Jansen kende ta bayendo Hulanda, lo studia den e ciudad di Utrecht y lo studia pa “Logistiek en economie” cu ta un estudio di 4 aña. Despues cu e termina esaki e lo kier haci su masters y bin bek Aruba y su desea pa tin su propio compania.

 

E studiante Luis da Silva a ricibi diferente informacion for di Departamento di Enseñansa y el a haya e anochi a bay bon. E anochi aki pa Luis da Silva ta un recordatorio di kico lo pasa na Hulanda. Luis da Silva lo bay “Communication Multi Media Design” na Den Haag y e estudio lo dura 4 aña y 2 aña pe masters.

 

Katherin Lampe ta un di e studiantenan cu ta bayendo Rotterdam y lo studia den “International Business and Languages”, pero tambe e lo studia na banda mas idioma y e lo dura 4 aña pe bachelor, mientras pe estudio di idioma lo dura 2 pa 3 aña. Despues cu Katherin Lampe a dicidi cu e kier bay studia na Hulanda, el a cuminsa busca tur informacion corecto. El a haya cu e anochi informativo hopi bon y a ricibi hopi informacion cu e tabata desea di haya sa.

 

Pa Nicole de Cuba e anochi informativo tabata uno hopi bon pasobra nan a ricibi hopi informacion. Nan a haya sa kico ta tur e stapnan cu nan tin cu tuma ora di yega Hulanda, prome cu bay, e seguro y con e bida ta na Hulanda. Nicole de Cuba ta sinti cu e no ta completamente cla ainda pasobra tin cosnan cu e mester caba di regla. Pero cu e informacionnan cu el a ricibi e ta sinti cu esey a yuda nan tur hopi. Nicole de Cuba a termina su MBO den enfermeria y awo ta bay pa su HBO na Leiden.

 

E anochi informativo tabata hopi practico y hopi loke nan a papia di dje como mayor cu ta interesa den nan yiunan mester a repasa e preguntanan varios biaha, asina e mayor Wendle Hasham a indica. E ta haya cu a pone e anochi informativo ta uno bon, pasobra tin mayor cu ta hopi ocupa y no a haya e chens pa dedica na esaki. E di 2 yiu di Wendle Hasham ta bayendo Hulanda y e sa cu awo su yiu ta mas enfoca pa bay studia afo. E yiu di Wendle Hasham ta bay studia “Marine Biology” y medio ambiente na Den Haag.