Home Uncategorized Cu enfoke riba aspectonan social, di enseñansa y bienestar general AVP a...

Cu enfoke riba aspectonan social, di enseñansa y bienestar general AVP a lansa Mervin Wyatt-Ras pa su di dos termino

SHARE

ORANJESTAD, Aruba – 26 di Juni 2017: Diabierna anochi na sede di AVP na Savaneta, partido AVP a lansa Drs. Mervin Wyatt-Ras como candidato pa di 2 biaha. Mervin Wyatt-Ras a celebra e anochi na grandi hunto cu su sostenedonan, pero tambe hunto cu su coleganan di partido. Desde oranan di trempan e actividad a inicia cu pegamento di sticker di AVP riba autonan, unda cu hopi sostenedo di AVP a pasa busca nan sticker y a mustra con contento nan tabata di mira cu un biaha mas Mervin Wyatt-Ras ta riba e lista.

E anochi a sigui cu animacion di DJ pa despues Buleria subi escenario pa pone tur hende baila. Ataniro tambe tabata presente y a entretene tur presente. Na momento di anuncia Mervin Wyatt-Ras como candidato, sostenedonan a cana yega cu brassband.

Presente na e evento tabata Benny Sevinger, Mike Eman, Clayton Croes, Marlon Sneek, Gerlien Croes, Mike de Meza, Clarisca Velasquez y hopi colega mas. Tambe ruman di Mervin Wyatt-Ras, esta Felipe Ras, a tira un discurso mustrando su sosten, tambe 2 “first time votters”, esta Nicole y Nigel y sin lubida ex Parlamentaria Glenda Margareta kende ta un persona conoci di Savaneta. Na final di anochi Le Groove a clausura e evento riba ritmo di Soca.

Drs. Mervin Wyatt-Ras tabata contento di por ta un biaha mas riba lista di AVP. “E emocion ta grandi pasobra mi a haci hopi pa bay riba AVP, pasobra e tempo ey mi a cambia di partido”, asina Mervin Wyatt-Ras, actual Presidente di Parlamento, a indica cu yen di emocion. A sak’e for di otro partido na u forma masha mahos y cu cara na halto el a sigui bay dilanti. Ta importante pa loke e partido AVP kere y para pe pasobra e ta un partido Cristian Democrata y ta duna oportunidad na tur hende.

Mervin Wyatt-Ras ta sinti cu e partido ta duna proteccion tambe na esunnan vulnerabel den comunidad y semper e tabata simpatisa partido AVP pa esey. “Mi ta haya cu AVP ta sali na defensa di esunnan cu limitacion, mamanan soltera, esunnan cu tin menos recurso. Pa mi ta importante pa ora ta traha pa un pais, bo ta traha pa bo pueblo, bo ta pone bo pueblo central y esey semper mi a mira”, di acuerdo cu Mervin Wyatt-Ras. E ta haya cu Mike Eman, lider di e partido, semper a pone interes di otro y no personal padilanti. Tin biaha e ta haya cu e ta un tiki critico y tin otro opinion, pero nan ta yega na mesa y esey ta e grandesa di un partido unda tin respet pa otro.

Mervin Wyatt-Ras den su carera a funciona como Parlamentario cu ta defende Gobierno, sinta den oposicion y na dos ocasion caba como Presidente di Parlamento. Pa su persona ta importante ora di eleccion pa para pa un reto y e ta sinti cu semper e ta para cla pa traha, pasobra unda cu pone pa traha e ta cla pa haci esey.

Un di e enfokenan di Mervin Wyatt-Ras ta social y e ta kere cu e desaroyo social ta para hopi central. Gobierno a bin ta trahando pe parti social y e ta kere cu esey ta loke mester sigui haci. “Nos tin cu haci cu nos hendenan cu no tin mucho placa den nan cartera, pa nan tambe por haya oportunidadnan. Den enseñansa, nos muchanan cu nan mayornan no tin hopi placa, nan por studia, nan por bay den exterior y sigui studia. Cu e muchanan por haya un financia cu nan por paga bek na un manera husto”, asina Mervin Wyatt-Ras a splica.

Durante e anochi aki Mervin Wyatt-Ras a gradici su team, su coleganan, su sostenedonan, team di Prome Minister cu a yuda nan pero tambe e bandanan y cu tur por a bini hunto. E candidata tin diferente ambicion, un di nan ta pa traha pa Aruba. El a sigui expresa na e sostenedonan cu e trabou awor ta pa sigui haci loke por pa trece mas igualdad pa Aruba y cu hendenan por ta mas uni. Tambe pe enseñansa por ta uno cualitativo, unda e muchanan por tin oportunidad di desaroya nan mes y tin materialnan innovativo y sin lubida pa tur hende tin trabou pa por pone cuminda riba mesa. Drs. Mervin Wyatt-Ras ta cla pa sigui lucha pe retonan cu ainda tin.

Drs. Mervin Wyatt-Ras a participa pa prome biaha den eleccion na aña 2001 y a ricibi 735 voto, sigui pa eleccion di aña 2005 unda el a logra 529 voto y na aña 2009 cu 703 voto. Den su carera den partido MEP, el a ocupa e puesto di Parlamentario y Presidente di Parlamento. Den eleccion di aña 2013, despues di a bandona MEP, Drs. Mervin Wyatt-Ras a subi lista di AVP como candidata na # 7 y a logra 834 voto, mas cu nunca! Despues di a sirbi na dos ocasion como Presidente di Parlamento, acumulando asina hopi experencia y conocemento politico, den e siguiente eleccion Mervin Wyatt ta aspira mas voto ainda pa por sigui crece y pa por sigui sirbi nos comunidad den forma responsabel, integro, serio y semper trahando pa derecho di nos hende muhenan.