Home Uncategorized N.V. Elmar cu advertencia serio na tur cu ta traha cu coriente...

N.V. Elmar cu advertencia serio na tur cu ta traha cu coriente Mester tuma medidanan di siguridad ora traha cerca di coriente Coriente ta peligroso y por tin consecuencia fatal!

SHARE

ORANJESTAD, Aruba: Diasabra ultimo nos comunidad a wordo conmovi pa un incidente na unda cu un persona a bin den contacto cu un di e wayanan di voltahe halto di electricidad di N.V. Elmar y cu tabatin consecuencia fatal. N.V. Elmar ta extende palabranan di sincero y profundo condolencia na famia di e fayecido.

No obstante, N.V. Elmar ta enfatisa riba e peliger cu electricidad ta trece cun’e pa asina evita casonan similar. Coriente ta peligroso pa sernan humano, ya cu coriente di mas cu 30mA (milli-ampère) ya caba por tin consecuencia fatal. P’esey precaucion na cas por ehempel ta obligatorio pa instala e asina yama “aardlekschakelaars” den tur cas. E tipo di aparatonan aki lo evita cu coriente peligroso por pasa door di curpa di hende.

E red di coriente di N.V. Elmar ta cubri gran parti di nos isla. Parti di e red aki ta instala bou tera y parti di e red aki ta core ariba pa e distribucion di coriente. E wayanan instala ariba tera ta colga asina halto na e palo di luznan cu, bao di circunstancianan normal, ta imposibel pa yega na esaki. Na e palo di luznan aki tin dos sistema di waya ta core, e voltahe abou, esta “laagspanning” (mayoria di biaha esakinan ta e 4 wayanan cu ta colga mas abao) y wayanan di voltahe halto esta “hoogspanning” (e tresnan mas halto), tur dos ta peligroso.

Pa “laagspanning” ta conta cu NO por mishi cu nan, pa evita electrocucion. Pa waya di “hoogspanning” e peliger ta hopi mas grandi ainda, ya cu e voltahe ta asina halto cu e coriente por bula door di aire y causa electrocucion. Mantene distancia ta sumamente importante.

N.V. Elmar tin su red di voltahe halto “hoogspanning” cu un tension di 12,000Volts cu por causa electrucion si yega mas cerca cu 16cm. Sin embargo, siguridad ta exigi cu trahadonan di N.V. Elmar, cu ta getrain y certifica den e ramo di electricidad, mester mantene un distancia minimal di 1.16 meter. Pa tur otro hende ta conta cu mester mantene un distancia di minimal di 3 meter for di e waya nan aki pa evita peliger.

Den casonan riba companianan cu ta traha cu pomptrucks, dumptrucks, hoogwerkers, steigers y trapi, e ta hopi importante cu si bo ta traha cu aparato, vehiculo, herment of instrumento den cercania di waya di coriente pa bo ta consciente cu bo por bin den contacto cu e wayanan aki. Si bo ta pensa di yega mas cerca cu 3 meter stipula, mester solicita supervision di N.V. Elmar pa garantisa bo siguridad. E aviso aki ta conta tambe pa esunnan cu ta haci trabao di snoei na por ehempel pal’i coco y matanan di kwihi. Tene cuenta cu coriente por pasa door di mata si esaki ta pega na e wayanan di voltahe halto.

Un aviso special ta bay pa esunnan (cu mayoria bes ta mucha) cu ta hisa fli. Ta prohibi pa hisa fli unda cu tin wayanan di coriente cu ta un peliger grandi pa cu esunnan cu ta haci e actividad aki. Fuera di e peliger, regularmente e actividad di fli ta esunnan cu ta causa cu areanan ta keda sin

coriente ya cu esaki ta pega den nos wayanan di coriente y ta trece inconveniencia ya cu clientenan ta keda sin coriente.

Manera menciona cu, cualkier compania cu ta desea mas informacion tocante e topico di siguridad, por pasa na N.V Elmar pa por haya mas informacion y e documentacion apropia. Si ta insigur of te haya necesario pa traha cerca wayanan di coriente, N.V. Elmar lo asisti den sea kita coriente of supervisa e trabou.