Home Uncategorized WEB ta refleha, celebra y conmemora 22 DI JUNI 85 AñA...

WEB ta refleha, celebra y conmemora 22 DI JUNI 85 AñA DESALINACION DI AWA Y 25 AñA WEB ARUBA COMO NV

SHARE
GE

ORANJESTAD – WEB Aruba ta di fiesta. Diahuebs 22 di juni e compania di awa y energia ta conmemora oficialmente e hecho cu 85 aña pasa a cuminsa desalina awa na Aruba y tambe cu 25 aña WEB a bira un NV. ‘Durante 85 aña nos a haña nos ta adapta constantemente na cambionan. Mayoria cambio drastico na WEB a tuma lugar den e ultimo 10 pa 15 añanan. Na mes momento desaroyo ta mustra cu innovacion y desaroyo lo acelera ainda mas liher. Mas bien ta papia di añanan en bes di decadanan.’ Asina director general di WEB, Luis Oduber a bisa durante un conferencia di prensa. Hunto cu director financiero di WEB, Randolph Ruiz, el a refleha riba e logronan riba tereno di desalinacion di awa y generacion di energia durante 85 aña. WEB lo celebra e aniversario cu comunidad, pagando e cuenta di awa 85 cliente cada luna pa e proximo seis lunanan.  Tambe lo inicia un campaña pa colecta recuerdonan di WEB cual lo resulta eventualmente den un tesoro di recuerdo di 85 aña.

 

Un tiki di Historia

Riba 22 di juni 1932, LandsWaterVoorziening oficialmente a pone den operacion e prome planta di awa cu un  capacidad di 200 meter cubico pa dia, mas 2 reservoir na Balashi. Awendia nos plantanan di awa tin un capacidad di 44000 meter cubico pa dia y nos tin 6 reservoir di awa riba tereno di WEB y 7 rond di nos isla. Dia 22 di juni ta conmemora tambe cu 59 aña pasa Aruba su Water- en Energiebedrijf a produci e prome megawattnan pa e isla y awendia ta produci un averahe maximo di 135 Megawatt pa dia. 

 

Durante e 85 añanan di desalinacion di awa, a pasa den hopi cambio. Despues di e traspaso di Landswatervoorzieningsdienst, LWVD, na 1956 den WaterVoorzieningsDienst, WVD, cu tawata departamentonan di gobierno di Aruba y e construccion di un planta nobo na 1958, a keda inverti placa den unidadnan nobo pa hisa e capacidad di produccion di awa y coriente. Den e periodo despues te cu 1984 a cambia pa e tecnologia di evaporacion Multi Stage Flash y na aña 2008 a introduci e tecnica mas eficiente, esta SeaWater Reverse Osmosis. Riba tereno di energia, WEB no a keda atras. Na 1958 a inicia e produccion segun e sistema integra di boiler y turbina di vapor. Mientrastanto a bin cambio den e status huridico di e compania. Na 1961 Watervoorzieningsdienst a bira Water- en Energiebedrijf (WEB) y na 1992 Gobierno di Aruba a privatisa e servicio den WEB Aruba NV cu Gobierno di Aruba como unico accionista.

 

Desaroyo pa eficiencia y sostenibilidad

E desaroyo pa hisa eficiencia den curso di tempo a continua. Pa motibo di e prijs haltisimo di combustibel, na 2006 a introduci e prome motornan RECIP pa produccion di energia. Entretanto bou di poblacion e conscientisacion pa cu medio ambiente ta crece.

 

 

 

E combinacion di eficiencia y e importancia pa preserva medio ambiente a pone cu na 2009 a introduci energia sostenibel, en particular energia di biento cu Windpark Vader Piet.

Esaki tawata un novedad pa Aruba, pero tambe pa WEB. Cu e introduccion di energia di biento, no por a stop e desaroyo sostenibel mas.

 

Pa cumpli cu su vision di yega na un operacion mas limpi, mas berde y liber di fuel oil na 2020, WEB Aruba a sigui enfoca riba proyectonan pa introduci mas energia sostenibel. Den e cuadro aki,  energia solar a haci su entrada desde 2015 y 2016. ‘Mirando bek, nos por conclui cu durante 85 aña nos a haña nos ta adapta constantemente na cambionan. Si nos para keto un rato, nos ta realisa cu mayoria cambio drastico na WEB a tuma lugar den e ultimo 11 añanan. Y futuro desaroyo ta mustra cu innovacion y desaroyo lo acelera mas bien pa aña en bes di pa decada.’, asina Luis Oduber ta opina.

 

Trends

Cu bista riba futuro, Oduber ta nota algun trend. E ta mira cu mas y mas consumidor lo genera nan propio coriente na cas y di e forma aki nan tambe lo bira productor di energia; Kisas den futuro WEB lo mester produci menos energia; Kisas lo tin mas cu un productor di coriente; Naturalmente produccion di energia ta keda un tarea importante pa WEB; pero e cantidad di energia sostenibel manera di solo y biento lo aumenta mas y mas, compara cu energia tradicional; Hecho ta cu energia sostenibel no ta un fabula mas. Na mes momento e almacenahe di energia ta bira mas y mas factibel. Baterianan ta desaroya den tur forma y compatibilidad.

 

Oduber ta agrega cu diferente fuente di energia ta rekeri un operacion di produccion diferente. E ta mira cu software pa maneha un operacion combina cu fuente di energia tradicional y sostenibel ta bira mas y mas inteligente y factibel. ‘Tur e trendnan aki ta influencia e tarea di WEB como productor di coriente. ‘Nos ta hopi consciente cu nos no por sinta keto si nos kier keda cumpli cu cliente y comunidad. P’esey na nos ta monitor tur tendencia, explora posibel solucion y cambio cu esakinan ta trece cu ne. Hunto cu nos empleadonan, nos compania ruman ELMAR, nos  compania mama Utilities Aruba y Gobierno di Aruba, nos TIN cu prepara pa futuro. Esaki ta exigi un vision mutuo, liderazgo, un mindshift y guia structura di procesonan di cambio.’, Oduber ta opina.

 

Gradicimento

WEB a haci uzo di e oportunidad di gradici durante e conferencia di prensa. ‘Nos ta hopi agradecido y no por keda sin bisa danki na pueblo di Aruba en general y en particular na tur penshonado di nos compania. Y last but not least MASHA DANKI na nos staff y empleadonan, danki pa boso dedicacion y motivacion pa tur dia di nobo suministra awa di calidad halto y coriente confiabel. Masha danki!’, asina director Luis Oduber a termina.

 

Celebracion cu comunicad

E aniversario di 85 aña no solamente ta pa refleha, sino tambe pa celebra y conmemora. Hefe di Servicio na Cliente na WEB, sra. Jennai Chin durante e conferencia di prensa a lansa e campaña di celebracion.

 

 

 

E campaña ta encera cu tur luna 85 cas tin chens di ricibi un cuenta di awa cu ta paga caba door di WEB. Participacion ta hopi facil. E cliente no mester haci nada. Su number di percela ta su number di lot. Ganadornan di luna, lo nota cu e saldo di nan cuenta di awa pa e luna concerni ta 0,00 florin. E campaña ta conta pa e cuentanan di awa di Mei te cu October 2017. Tur luna di nobo lo tin 85 ganador entre tur cliente recidencial; pues al final lo tin un total di 510 ganador. Dus clientenan, keda pendiente y check bo cuenta DI AWA asina cu e yega den brievenbus.

 

Conmemoracion

Relacionista Publico di WEB, sra. Asja Dongen finalmente a bisa cu ta hopi importante pa conmemora e aniversario di 85 aña tambe. Ela anuncia cu lo haci e conmemoracion den un forma innovativo. ‘Pronto nos lo lansa nos campaña ‘Mi tesoro di WEB’, caminda nos lo pidi empleadonan, penshonadonan di WEB of nan famia, personanan cu a yega di traha hunto cu WEB den un of otro proyecto, tur pa upload riba webaruba.com, cualke potret, storia of video di cual nan tin un recuerdo di WEB, di historia di desalinacion di awa of di produccion di energia.’ Pronto WEB lo comunica con esaki ta bay, pero ta pidi for di awor pa cuminsa colecta ‘e recuerdonan’.

Oradornan durante conferencia di Prensa:

  • Luis Oduber, director general WEB Aruba
  • Randolph Ruiz, director financiero WEB Aruba
  • Jennai Chin, hefe departamento di Servicio na Cliente WEB Aruba
  • Asja Dongen, relacionista publico WEB Aruba