Home Uncategorized Un biaha mas Minister de Meza a sigura trahadonan di SERLIMAR cu...

Un biaha mas Minister de Meza a sigura trahadonan di SERLIMAR cu nan no ta perde nan trabou

SHARE

ORANJESTAD – Minister Mike de Meza, encarga cu asuntonan di medio ambiente, hunto cu su colega encarga cu Infrastructura, incluyendo SERLIMAR, Minister Benny Sevinger, a reuni cu representante di trahadonan di SERLIMAR dialuna mainta. E tabata un reunion urgente cu a wordo pidi, ya cu e funcionarionan tin miedo cu door di cambio den e sistema di dump, un grupo lo perde nan trabou.

“Esaki absolutamente no  ta e caso. Recientemente mi a informa nan caba cu e maneho pa cu dump no ta nifica cu nan lo perde nan trabou. Nan trabou ta garantisa,” e mandatario a enfatisa na final di encuentro cu sindicatonan SEPPA, Magaly Brito y Raymundo Marlin, y STA, Diego de Cuba, kende ta esun cu a pidi un reunion cu Gobierno.

E preocupacion ta cu e trahadonan di SERLIMAR lo perde nan trabou como cu tin pensa di cera dump. “Mi a splica nan, un biaha mas, cu esaki no ta caso! Gobierno no tin intencion di laga niun hende bay cas! E trahadonan di SERLIMAR tin nan funcion y SERLIMAR tin su derecho di existencia y ta haciendo un bon trabou pa Gobierno.” E preocupacion di Gobierno, Minister de Meza a bisa, ta e situacion reinante na Parkietenbos. E sistema cu ta uza pa maneha dump, ta algo cu Gobierno ta haya cu mester cambia. E situacion actual no por sigui, e ta hopi satura (yen) y ya a yega e momento cu mester sanea e dump di Parkietenbos y crea un espacio nobo, unda cu SERLIMAR lo haci su actividadnan relaciona cu e desperdicio di Aruba.

E sistema cu Gobierno kier pa maneha sushi, mester ta un sistema mas estricto, cu tecnologia mas avanza y di un forma mas responsabel. E situacion awor aki, e mandatario a splica, no ta nada agradabel ya cu tin un dump habri, cu hopi candela cu tin su efecto negativo pa e medio ambiente y esnan cu ta biba den e area ey. E dump ta uno cu ta existi pa casi 50 aña y ta algo cu mester a wordo para basta tempo pasa caba, ta e opinion di e mandatario.

Diaranson ultimo mes Minister de Meza tabata eynan y a mira un candela grandi, y cu ta demostra cu ta iresponsabel pa e dump sigui wordo maneha di e forma aki. Den e situacion reinante e trahadonan ta haciendo nan esfuersonan maximo, pa cual e ta admira nan, pasobra e no ta un situacion responsabel pa nan sigui traha den e ambiente ey, y tampoco pa e bisindario. Pesey mester traha den un forma accelera riba un plan total cu ta tuma na consideracion e situacion a termino cortico y largo, pero den un forma sostenibel.

Esey a wordo splica na e sindicatonan y cu ta imposibel pa cera e dump di un dia pa otro sin un otro solucion of alternativa serio. Awo ta trahando riba un plan, sperando cu pa fin di luna por duna nan un presentacion di kico por haci na dump, pa sanea Parkietenbos. Ta bay tin trabou pa hopi aña eynan mes ora cu cuminsa cu e saneamento. Esey lo ta un trabou di SERLIMAR tambe, esta pa sanea e dump y tambe na un di dos sistema di atende cu desperdicio. “Nos ta garantisa tur hende nan trabou. No tin un conflicto laboral. Cu tin hende ta preocupa door di storia, mi por bisa cu tur aña di eleccion tin tur sorto di rumor cu ta wordo crea door di esnan cu tin hopi tempo liber y hopi biaha ta oponentenan politico. SERLIMAR ta un compania cu Gobierno ta kere den dje.”