Home Uncategorized Parlamentario mr. Juan E. Thijsen (MEP): Minister Arthur Dowers kier awor pa...

Parlamentario mr. Juan E. Thijsen (MEP): Minister Arthur Dowers kier awor pa contrincantenan bin cu solucion pa e situacion di criminalidad alarmante.

SHARE

Parlamentario mr. Juan E. Thijsen a tuma nota di un declaracion di Minister Arthur cu otronan tin cu bin cu solucion. Minister Arthur Dowers: “Tur hende ta papia di crimen, pero ningun hende ta papia di solucion”. Parlamentario mr. Juan E. Thijsen ta kere cu esaki ta un ofensa pa e votadornan cu a bai tras di AVP su promesa den eleccionan pasa y a duna AVP un base amplio pa resolve e problemanan di criminalidad di nos pais. E ta tambe un ofensa pa nos sistema constitucional. Un Ministro di Husticia tin e tarea segun nos constitucion pa atende cu problemanan di criminalidad den nos comunidad.

Segun Parlamentario mr. Juan E. Thijsen tur hende por corda e video na unda Mike Eman ta sali for di tras di un muraya manera superman bisando “Nos tin un plan, AVP tin un plan pa atende cu criminalidad. Tambe di Dowers mes tin varios video unda Dowers prometiendo cu e ta bai soluciona e problema di criminalidad na Aruba despues di acusa Nel Oduber di ta responsabel pa tur criminalidad na Aruba. Segun Parlamentario mr. Juan E. Thijsen e realidad a resulta otro y Dowers y Eman ta bai den historia pa e fracaso mas grandi den combatimento di criminalidad. Awendia ni e cuidadano, ni e comerciante ni turistanan ta sinti nan mes sigur tanto riba caya como den cas, negoshi of establecimientonan hotelero. Segun Parlamentario mr. Juan E. Thijsen Dowers a faya directo den su maneho y Mike Eman ta faya como lider di nos pais como cu e criminalidad ta toca otro carteranan di su gabinete tambe. Parlamentario mr. Juan E. Thijsen ta identifica 6 categoria di criminalidad na Aruba:

 

 

  1. Criminalidad cu origen socio economico

Den e situacion di un economia ta malo no ta tur cuidadano tin e capacidad pa resolve problemanan dentro di cuadra e leynan castigabel. Tin cuidadanonan ta recuri na solucionan mas facil pa nan problemanan economico y social den actividadnan cu ta castigabel pa ley.

 

  1. Criminalidad importa

Falta di un control debido di bo fronteranan por resulta den entrada (ilegal) di hendenan cu mal reputacion y mal intencion. Tambe un falta di un bon mecanismo di control por laga entrada habri pa hendenan bin participa den bo comunidad y bida social (legalmente) mientras e personanan aki tambe por ta di mal reputacion y mal intencion.

 

  1. Criminalidad comun

Manera tur pais Aruba tambe tin su hendenan cu ta escohe maneranan mas facil pa cubri nan necesidadnan. Tambe tin otronan cu no a haya suficiente guia di mayornan pa evita actividadnan castigabel. E kleptoman pues esun cu tin un enfermedad pa horta tambe ta cai bao e categoria aki.

 

  1. Criminalidad di oportunistanan

Tin hende cu si tin suficiente entrada pa cubri nan necesidadnan pero no ta satisfecho cu loke nan tin y kier mas. Hopi biaha nan ta hendenan cu ta mira oportunidadnan facil cu ta presenta pa horta y nan ta bai pe. Tambe bao di e categoria aki ta cai hendenan den funcion halto cu ta mira buraconan den ley pa horta.

 

  1. Criminalidad organisa

Mescos cu tur pais Aruba tambe tin su hendenan di categoria 4 cu ta asocia nan mes cu otro pa yega na mas plaka na maneranan castigabel pa ley den forma di crimen organisa y tin biaha nan ta hasta organisa nan mes cu crimen internacional.

 

  1. Criminalidad moral

Bao criminalidad moral ta cai casonan castigabel pa ley y cu ta moralmente incorecto manera casonanan di maltrato, abuso sexual y asesinato.

 

Parlamentario mr. Juan E. Thijsen ta urgi e pueblo pa sigui e desaroyonan den combatimento di criminalidad na Aruba di cerca y vota consciente den siguiente eleccion  pa un resultado cu lo conduci na un gobierno cu si tin e capacidad pa resolve e problemanan grandi di criminalidad na Aruba. Segun Parlamentario mr. Juan E. Thijsen su persona y partido MEP ta cla pa e reto aki. Hunto p’e cambio sin miedo.