Home Uncategorized CHATA celebrando nan di 50 aña di existencia ARUBA SU STRATEGIA TURISTICO...

CHATA celebrando nan di 50 aña di existencia ARUBA SU STRATEGIA TURISTICO PRESENTA COMO EHEMPEL DI ‘BEST PRACTICES’

SHARE

WILLEMSTAD– En coneccion cu e di 50 aña di existencia di Curaçao Hospitality & Tourism Association (CHATA), e organisacion a tene un evento cu tur su miembronan. Pa es ocacion aki CHATA a invita Sra. Ronella Tjin Asjoe-Croes, CEO di Aruba Tourism Authority (A.T.A.), pa comparti e historia di A.T.A. sui generis, su structura y strategia cu a contribui na e crecemento di Aruba su turismo, cu ta wordo considera como un ‘Best Practice’ den Turismo den e region. Informacion referente e modelo di maneho di Turismo di Aruba y referente maneho di A.T.A. sui generis ta sigur wordo solicita pa varios den Caribe.  CEO di A.T.A. a indica cu Curaçao y Aruba tin hopi en comun. No obstante esaki, producto turistico, strategianan turistico y tambe evolucion y maneho turistico ta diferencia.

 

Durante e presentacion Sra. Tjin Asjoe-Croes a referi riba Aruba su ‘track-record’ turistico y economico, na unda e cantidad di bishitante cu a wordo ricibi na 1985 di 200,000 persona a aumenta te na 1,100,000 bishitante stay-over na 2016.  Cu esaki Aruba su GDP a crece di $406 miyon (1985) pa $2.7 biyon (2014). Awendia Aruba ta e di dos pais riba nivel mundial cu ta depende di su turismo cu ta representando un 88% di Aruba su GDP y 89% di e mercado laboral. For di un departamento gubernamental, awendia A.T.A. sui generis ta un organisacion cu ta financieramente independiente di gobierno, cu su mes un mecanismo di fondo atravez di e.o. un “Tourism Levy” y un “Travel Promotion Levy”. E modelo financiero aki ta un di e forsanan tras di Aruba su desaroyo, maneho sostenibel y eficiente di Aruba su turismo. Un logro grandi y sin precedente pa Aruba. Banda di e modelo financiero, e organisacion a haña un “overhaul” completo na 2011 cu un structura nobo, un ekipo cu a recruta “from scratch” incluyendo si varios persona cu tabata labora na e A.T.A. como departamento di gobierno. Sra. Tjin Asjoe-Croes ta e promer CEO di e entidad nobo aki.

 

Desde inicio di A.T.A. SG, e asina yama Tourism Receipts a crece cu un averahe di 4% pa aña. Cantidad di bishitante ‘stay-over’ tambe a conoce aumentonan cu un averahe di 5% pa aña, mientras pasaheronan crucero a aumenta cu un averahe di 2% pa aña. Den su totalidad esaki ta refleha den crecemento consistente den entrada pa camber di 5% pa aña. Subsecuentemente tambe por nota cu Aruba su turismo a diversifica. Si tuma un ehempel di añanan 1985-1986 y 2004-2005 e averahe di bishitante Mericano tabata un di 73-74% di Aruba su turismo. Awendia  e mercado mericano ta un 57% di nos bishitantenan, el a multiplica 5 biaha desde 1986 resultando den un total di 628 mil bishitante mericano den 2016.

 

No obstante e oportunidadnan cu crecemento di Aruba su turismo ta trece cu’ne, e ta presenta su retonan tambe. Durante añanan, Aruba su enfoke ta programa pa bira menos riba cantidad y mas riba calidad. Como tal mester A.T.A. ta enfoca entre otro riba atraccion di e bishitante cu ta dispuesto pa gasta mas y laga mas atras, pero tambe ta enfoca riba mehoracion continuo di e producto ‘Aruba’ cu mester keda eleva den calidad. E evolucion di A.T.A. di un “Destination Marketing Organization” (DMO) pa un “Destination Marketing and Management Organization” (DMMO) na 2015, tabata un evolucion recien den e modelo di A.T.A. sui generis.

 

E CEO di A.T.A. a relata e importancia di ta un organisacion independiente cu un bon relacion entre sector priva y publico. E bienestar general di e isla mester ta semper punto cardinal, considerando e dependencia halto di turismo. Segun e estado di odernanza di A.T.A., A.T.A. mester entrega su rapport  anual na su miembronan di hunta di supervision no mas tarda cu 1 di april  tur aña, mientras cu e presupuesto anual  mester wordo entrega no mas tarda cu tur 1 di september tur aña. Desde e comienso di A.T.A. SG. entrega di prepsupuesto y rapport annual, semper a wordo entrega na tempo. Consecuentemente esaki ta implica cu e organisacion ta constantemente bao di evaluacion y desaroyo continuo, algo cu A.T.A. ta pone hopi balor na dje.

 

“E restructuracion di A.T.A. como entidad independiente, basa riba un colaboracion entre sector priva y publico, ta un paso imperativo pa crea un organisacion competitivo, fortaleciendo su funcion como “Destination Marketing & Management Organization”, sigurando cu Aruba ta permancece como socio y participante fuerte cu ta cla pa sigui pa e siguiente nivel”, CEO di A.T.A. sui generis sra. Ronella Tjin Asjoe-Croes a duna un obsekio na Minister di Desaroyo Economico di Curaçao, Steven Martina y  tambe Director di CHATA sr. Miles Mercera como muestra di aprecio. Sra. Tjin Asjoe-Croes a finalisa su presentacion sperando di asina por a sirbi como inspiracion pa CHATA y asina contribui tambe na turismo di nos hermana isla Curaçao.