Home Uncategorized Experto di coriente, den un entrevista cu nos ta duna algun tips...

Experto di coriente, den un entrevista cu nos ta duna algun tips y tambe kiko lo por a bay robes na Camacuri

SHARE

Oranjestad – Despues di e incidente lamentabel cu a sosode diasabra atardi, nos a acerca un experto ariba tereno di coriente y cu den e entrevista nos lo referi na dje come e Experto.

Experto : Regla number 1 semper semper keda minimo 1,5 meter leu di wayanan di coriente, no haci wega cu coriente. Den bebouwde kom bo ta haya wayanan di  coriente di laagspanning, si bo mester yega den contacto cu nan, esaki si no ” ta laga bo los ” asina facil, e ta keda tene bo causando dañonan hopi grandi y sigur  cu por ta fatal.

Arubanative.com : Kiko bo persona ta pensa, cu lo por a pasa diasabra atardi na Camacuri.?

Experto : Posiblemente e persona no a pone atencion cu e tawata hopi cerca di e wayanan, un persona cu NO tin conocemento di coriente mester keda  minimo 3 meter leu di e wayanan aki  y segun mi por a wak via potretnan cu esaki tawata hopi cerca mes.

Experto : E incidente tawata uno fatal, pues un morto instantaneo. Ey riba nan bo ta haya 3 waya, cada waya ta 12.5KVA (Kilo Volt Ampere), pues manera nan ta bisa na Ingles High Voltage Cables.

Arubanative.com : Loke na e sitio nos a wak cu e parti na su cabes a sufri hopi daño, kiko esaki kiermen ?

Experto : Manera boso mes a bisa caba, den un descuido su cabes lo a yega den contacto cu e waya, causando cu e coriente a pasa via su cabes bay abou, buscando ground, esta un exit (salida).

Arubanative.com : Si un hende a bay trata na yuda e momento ey di un of otro manera, e tambe lo por a wordo electrocuta ?

Experto : Claro cu si, e lo tawata un morto instantaneo tambe. Pues si un persona a mishi cu kiko cu ta sea e hoogwerker of auto, pa e tambe sigur  lo tawata fatal. Ta pesey mester a warda ariba esnan di Elmar N.V. yega, pa asina percura pa tur cos ta safe pa por a baha e curpa.

Arubanative.com : Nos ultimo pregunta, e billboard ta cerca di e wayanan di coriente ?

Experto : Mi opinion personal , e billboard mester wordo hala pa siguridad mas leu di wayanan, un poco mas pariba di e billboard aki mes tin un otro cu ta mas cerca di e wayanan ainda, pues lo ta bon pa e doñonan di e billboards nan aki revisa e posicion, pa evita un tragedia asina aki den futuro.

Loke a pasa diasabra cu e tata di famia ta pone nos para keto tambe, ora tur e otro tatanan di famia ta subi bay halto, coriendo riesgonan grandi pa drecha coriente pa comunidad. Un trabou sumamente peligroso, cu ta algun hende so por hacie.

Mescos diasabra, mester a warda e profesionalnan di coriente yega na e sitio, pa asina sigura e area, pa tur e unidadnan na e sitio por a continua cu nan trabou. Na tur empleadonan di Elmar cu ta traha cu wayanan di tension halto, nos tin hopi respet pa boso trabou ycu  Dios proteha cada un di bosonan cu ta traha na bienestar di Aruba, ora tin problema cu coriente.

Nos ta spera cu e informacionnan aki nos por a contribui na informa tur hende, especialmente personal di polis,ambulance y brandweer cu ta hayanan hopi biaha cu mester traha hopi cerca caminda un auto por ehempel a dal contra un palo di luz y wayanan cu ta cay y por ta wayanan di cu por tin tension halto ariba nan. Hopi biaha hende no ta realisa cu e wayanan cu cay, por tin coriente ainda ariba nan cu si bo trapa of sea mishi cune lo por resulta fatal.
Ultimo tip di nos experto ta cu : Ora wayanan di coriente cay ariba un auto, despues di un accidente, no mishi cu e auto y laga e persona den e auto, si mishi cu e auto of e persona baha for di auto, si tin coriente ainda ariba e wayanan por resulta e persona aki fatal. Semper warda te ora personal di Elmar N.V. yega.

Tene debido cuenta cu e puntonan cardinal aki, pabo mes un seguridad y tambe di otronan.

Un biaha mas nos kier desea famia Luidens hopi forsa den e dianan nos dilanti, cu e fayecimento di nan ser stima Sr Gerald Luidens.