Home Uncategorized Evelyn Wever-Croes: Islanan BES ta pidi ayudo MEP su compromiso pa traha...

Evelyn Wever-Croes: Islanan BES ta pidi ayudo MEP su compromiso pa traha hunto pa estrecha lasonan entre islanan di Reino.

SHARE

Diahuebs 15 juni, durante reunionnan den Eerste Kamer na Hulanda, tabatin un encuentro historico entre Parlamentonan di Aruba, Boneiro, Corsow, Sint Maarten, Saba, Sint Eustacius y Hulanda. Esaki tabata un session hopi interesante na unda e representantenan di Boneiro, Sint Eustacius y Saba a elabora riba nan dolornan despues di ta pertenece na e Islanan BES. Cada isla a haya e oportunidad pa trece padilanti unda nan ta para y kico ta e problemanan cu nan tin den e constelacion di BES. Lider di MEP, Evelyn Wever-Croes ta elabora mas riba esaki:

“Den linianan general, e islanan aki ta sinti cu nan a wordo neglisha y cu nan ta wordo dirigi pa ambtenaarnan Hulandes di Den Haag cu no ta comprende cultura y situacion di e islanan di Boneiro, Sint Eustacius y Saba. E islanan aki a pidi atencion di e Parlamentonan di Hulanda, Corsow, Sint Maarten y Aruba. Nan a pidi pa sostene nan den nan lucha pa nan por haya mas di bisa den nan propio pais y haya un poco mas autonomia.

Den nomber di Partido MEP, mi a probecha di e oportunidad pa urgi y enfatisa riba e Parlamentarionan Hulandes, pa loke sea nan dicidi, nunca tuma decisionnan sin consulta cu e pueblonan di Islanan BES. Ta facil pa dirigi e islanan aki desde Den Haag, sinembargo no por dicidi riba e futuro di e islanan aki sin consulta cu nan prome.

Ya caba algun di e islanan aki tabatin referendum riba status den Reino. Pero claramente no tin mucho atencion y respet ta wordo duna na e referendumnan aki. En todo caso, pa cualkier decision, mas ainda cu awor decisionnan importante ta bay wordo tuma den e constitucion Hulandes pa loke ta trata e tres islanan aki, mi a urgi nan pa nan no tuma decisionnan sin consulta cu e islanan aki prome”.

Sra Evelyn Wever-Croes ta termina bisando: “Na final di dia, Boneiro, Corsow, Sint Maarten, Saba, Sint Eustacius y Aruba, ta islanan cu tin lasonan historico y lasonan familiar hopi fuerte cu ta uni nos. Mi ta premira un futuro hopi briyante si nos logra traha mas cu otro y yuda otro. Compromiso di Partido MEP una bes cu nos ta den gobierno, ta pa estrecha laso cu e demas islanan pa hunto nos traha riba e problema y desafionan cu cada un ta enfrenta riba diferente tereno. Esaki ta inclui terenonan di siguridad, salud y enseñansa. Riba tereno di oportunidadnan y posibilidadnan economico y di turismo”.