Home Uncategorized Tres homber ta drenta un enlace matrimonial na Colombia

Tres homber ta drenta un enlace matrimonial na Colombia

SHARE

Medellin, Colombia: Recientemente na Colombia, tres persona masculino a drenta un enlace matrimonial cu otro. Esaki ta pa prome biaha cu na Colombia tres persona ta casa cu otro y sigur lo habri caminda pa mas matrimonio di mas cu dos persona.

Según un di e cabayeronan, nan tin hopi aña caba ta biba hunto y ta comparti tur cos, cama, cas y mas. Un di e cabayeronan kemin nan ta hibando un bida Poliamoroso.

Anteriormente e relacion amoroso aki tabata consisti di cuater homber, pero tres aña pasa un a fayece.

Maske cu iglesianan na Colombia ta contra matrimonio di e mesun sexo, toch pa basta tempo caba via notaria hendenan di e mesun sexo por casa cu otro na Colombia.

E tres cabayeronan ta; un studiante di arte dramatico, un bailarin folclórico y e otro un periodista, nan a uni pa prome biaha,  dilanti un notaria. Notaria La Sexta pa prome biaha a realisa na Colombia un union asina entre tres persona di e mesun sexo.

Despues cu e enlace a keda cumpli, un di e cabayeronan a comenta cu awo nan ta un famia di tres y no trio mas. Pa e  cabayeronan e comunicación y compresión entre nan ta e base fundamental. Nan mester por comprende otro sexualmente paso esey tambe ta hopi importante den nan relación y tambe nan mester por hiba conversacionnan riba e mesun nivel.

Dos di e cabayeronan, Manuel y Alejandro tabata ta un pareha for di 2004 caba, después a uni otro un cabayero mas den nan relación y después e ultimo aki Victor a drenta den e relacion amoroso, te cu 3 aña pasa, nan relacion amoroso tabata consisti di 4 homber, pero después cu esun a fayece nan a keda tres. Nan ta luchando awo pa e pension di sobrevivencia di e partner cu a fayece 3 aña pasa.

Segunnan ta masha normal cu dos muher por pidi pa e pension di un homber y na varios ocacion corte a acepta esaki caba, pero awo pa prome biaha dos homber ta bringando pa e pension de sobrevivencia di un otro homber. Maske cu e juez recientemente no a dicta den nan favor,nan lo sigui bringa pa según nan, nan derecho.

Famia y amigonan di e tres cabayeronan ta sostenenan y apoyanan den nan decisión, nan mes no a spera tanto apoyo y sosten asina.

Te awor aki nan no a pensa ainda di adopta un yiu, pero no ta descarta e posibilidad cu pa den futuro, nan lo ta desea di amplia nan famia cu un of mas yiu.

Awo cu nan ta oficialmente casa, e tres cabayeronan aki ta buskando un lugar pa haci nan fiesta di bruid.