Home Uncategorized IMPACTO ECONOMICO DIRECTO TA 72 MIYON DOLLAR DEN ECONOMIA DI ARUBA TURISMO...

IMPACTO ECONOMICO DIRECTO TA 72 MIYON DOLLAR DEN ECONOMIA DI ARUBA TURISMO CRUCERO TA UN PARTI INTEGRAL DI ARUBA SU INDUSTRIA DI TURISMO

SHARE

Oranjestad – Durante e conferencia crucero di Platinum Associate Member Advisory Council (PAMAC), cual actualmente ta tumando luga na Aruba, A.T.A. conhuntamente cu Aruba Ports Authority (APA) a prepara un programa caminda lo brinda e ‘decision makers’ di industria crucero e experiencia cu Aruba ta ofrece na pasaheronan crucero como destino turistico. Yena cu actividadnan rond di nos isla y eventonan informativo y interactivo, e miembronan platinum di Florida-Caribbean Cruise Association (FCCA) tin enfoke riba inovacion y crecemento di e mercado crucero den e region Caribense.

 

Aruba su turismo crucero a inicia durante comienso di añanan 50 di siglo pasa. Barconan di cargo tawata bin e waf di Aruba, cu pasaheronan crucero abordo. Despues di esaki, na aña 1958, itinerarionan regular a inicia cu e linea crucero Prudential Graceline, di cual prome barconan cu a yega Aruba tawata Santa Rosa y Santa Paula. For di e tempo ey, e negoshi di turismo crucero a desaroya economicamente y a trece oportunidadnan comercial importante pa nos isla. Na 1990, Aruba a surpasa 100.000 bishitante crucero. E incremento for di eynan tabata uno rapido y na aña 2002 Aruba a surpasa mei miyon pasahero di crucero.

 

Ronella Tjin Asjoe-Croes – CEO di Aruba Tourism Authority- a laga sa cu e aña aki Aruba lo spera 750.000 pasahero crucero. Esaki ta un otro logro grandi pa cu turismo crucero pa Aruba, cual ademas lo celebra 60 aña den e industria di turismo proximo aña. Den 2018 ta proyecta cu Aruba lo ricibi aproximadamente 817.000 pasahero crucero.

 

No obstante cu temporada halto ta den crecemento, e enfoke riba desaroyo strategico pa crecemento den temporada di ‘low season’ ta un topico cardinal durante e conferencia aki. Esaki ta den liña cu Aruba su strategia di diversificacion y fluho consistente di bishitante den transcurso di aña. E aña aki, den lunanan di temporada abao di mei te cu september, Aruba a conoce un crecemento di 74% di pasahero crucero, sumando un aumento total di 190.000 bishitante mas pa nos destinacion.

 

Pa cu e prome 5 lunanan di 2017, pasaheronan crucero a aumenta cu 12.8%, compara cu e mesun temporada aña pasa, cual ta un total di 45.015 bishitante mas. Turismo crucero ta un parti integral di e industria di turismo pa Aruba, cual ta genera un impacto directo di mas cu 72 miyon dollar den nos economia. E turismo crucero ta duna empleo na mas cu 1.700 persona y ta duna un average di 29 miyon dollar na salario total di empleo.

 

Eventonan manera PAMAC ta posiciona Aruba como destinacion crucero den Caribe intercambiando conocemento y experticio cu continente Norte y Latino Americano, fortaleciendo Aruba su strategia di diversificacion turistico. Aruba Tourism Authority ta sigui desaroya su producto turistico y ta continua pa duna e miho servicio na e pasaheronan bishitando nos isla, asina manteniendo Aruba ‘top of mind’ como destinacion crucero.