Home Uncategorized KPMG na Health Care Conference Aruba 2017: Islanan mester inverti sabi y...

KPMG na Health Care Conference Aruba 2017: Islanan mester inverti sabi y traha hunto

SHARE

ORANJESTAD, Aruba: Inverti den prevencion, colaboracion mas estrecho entre e islanan Boneiro, Sint Eustatius, Saba y e islanan-nacion Aruba, Sint Maarten y Corsou y fortificacion di cuido di prome linea, o sea “eerstelijnszorg”. Esakinan tabata e consehonan mas importante di e debate final na e di dos Health Care Conference Aruba cu a tuma luga dianan 1 te cu 4 di juni ultimo. Mas of menos 400 legislado, administradonan y proveedornan di cuido a discuti e tema principal “cuido integral”.

 

Como un di e sponsornan principal KPMG Dutch Caribbean & Suriname ta mira bek riba un participacion exitoso na e conferencia: Un continuacion di KPMG DC&S su inversion structural den conocemento specifico den e ramo di cuido di salud. Asina Raymond Begina, Presidente di KPMG DC&S a referi na e “KPMG Health Conference” di aña 2013 na Renaissance Hotel Curaçao cu KMPG Health Global Leader Mark Britnell como un di e oradornan principal. For di e momento ey, KPMG DC&S a sostene proyectonan strategico importante den cuido di salud na, particularmente, Surnam, Aruba y Sint Maarten.


Organisa sabi

E contribucion di Dr. Anna van Poucke, Presidente di KPMG Health Nederland, na Health Care Conference Aruba a hala masha hopi atencion. Van Poucke a papia con den terminonan concreto ta e miho forma pa duna contenido na cuido integral na un forma practico y a duna ehempel nan concreto di storianan di exito. Simplemente bisa, tur cos ta bira rond di “organisacion di cuido na un forma sabi” pa medio di relacionnan di colaboracion fuerte entre esunnan cu ta ofrece cuido.

 

E enfoke aki ta riba provee cuido basa riba e necesidadnan real di e pashent. Tambe e cuido ta wordo organisa na cas of cerca di cas. Pues: “E cuido adecua, na e luga adecua”. Dokternan di cas, cuido den bario (wijkverpleging) y programanan di prevencion dirigi na gruponan di risico specifico ta hunga den esaki un papel central. E condicionnan basico necesario pa realisa esaki ta sistemanan di comunicacion digitalisa integra pa intercambio di datonan, un sistema di compensacion basa riba “balor” y un cultura of mentalidad unda cu bienestar di e ciudadano ta e factor cu ta encabesa tur proceso.


Retonan ta ofrece oportunidadnan

E islanan ta sinta cu retonan grandi cu ta di e mesun indole, manera e crecemento di embiehecimento y enfermedadnan cronico cu ta creciendo cada dia mas. E caracteristicanan specifico den e contexto local ta pone extra enfasis riba e sostenibilidad financiero di e sistema di cuido, pero ta ofrece na mes momento tambe oportunidadnan pa mas cooperacion. Iniciativanan riba tereno di cuido integra ta ofrece oportunidadnan pa actua riba esaki.

 

KPMG DC&S ta felicita Ministernan di Salud, Dr. Alex Schwengle di Aruba, Emil Lee di Sint Maarten y Suzanne Camelia di Corsou cu e firmamento di un declaracion di intencion pa e fortificacion di e cooperacion riba diferente nivel entre e islanan y den e cadena di cuido. Segun KPMG DC&S esaki por duna frutonan tanto riba termino cortico, como riba termino (mediano) largo. Asina e Ministernan por cuminsa cu algun “quick wins” manera comparti iniciativanan exitoso riba tereno di cuido preventivo.

 

Perfilnan di hospital

Riba termino (mediano) largo e islanan por alinea nan hospitalnan miho: Enfoca riba oncologia riba un isla y riba cuido cardiovascular riba e otro, por ehempel. Tambe ta consehabel pa inverti hunto den cuido “super-specialisa” pa cual pashentnan ta wordo manda den exterior actualmente.

 

Ademas ta importante pa den e relacion regional e sistemanan di cuido di e islanan ta interconecta cu otro. Pero tambe riba cada isla mester fortifica e colaboracion entre e cuido di prome y e di dos linea. Esaki ta beneficioso pa haci cuido di calidad pagabel y accesibel.