Home Uncategorized Gabinete Mike Eman For di 2009 a percura pa DAS por brinda...

Gabinete Mike Eman For di 2009 a percura pa DAS por brinda mas ayudo y awo mas cerca di cas

SHARE

ORANJESTAD – Na ocasion di apertura oficial di filial di Departamento di Asuntonan Social (DAS) na MFA Paradera Prome Minister Mike Eman, ademas di a felicita empleado y clientenan, tambe a trece dilanti e avancenan cu Gobierno a logra haci den e sector social durante ultimo ocho aña. E oficina nobo ta busca pa trece e servicionan di guia y bijstand mas cerca di e clientenan den sector di Paradera y bicindario, haciendo e acceso mas facil, pero tambe e experiencia, uno mas agradabel. Di otro banda a pone atencion y a traha pa brinda un ayudo mas grandi na tur esnan cu tin mester.

For di april ultimo e oficina di DAS ta sirbiendo clientenan, cual ta aworaki ta un promedio di 50 total pa siman. E asistencia social ta pa medio di profesionalnan cu den e ultimo añanan a busca mas pa cubri e demanda. E otro trabou di DAS ta e asistencia di bijstand, cual tambe a conoce un avance grandi bou maneho di Gabinete Mike Eman I y II.

“E bijstand basico na 2009 tabata 375 Florin pa un mama soltero y a aumenta cu 25% pa bira 405 florin. Na inicio di e aña aki atrobe a subi di 405 Florin pa 450 Florin. Loke anteriormente tabata e asistenia pa cada otro individuo, sea yiu of casa, tabata 140 Florin y tambe a subi cu 25%  pa a bira 175 Florin y a bin cu schoolkinderentoeslag cu a pone na 100 Florin prome y despues a subi pa 200 Florin y awo recientemente a haci’e 250 Florin,” asina Prome Minister Eman a splica.

Pa un mama soltero, esaki ta nifica cu bek na 2009 e tabata ricibi 650 Florin, pero awendia e suma aki a bay te na 1.400 Florin, loke ta mas cu dobbel. Minister President Eman ta consciente cu ainda tin espacio pa mehoracion y ta compromete pa sigui traha pa asina duna un mayor asistencia na famianan den necesidad. E oficina di DAS na MFA Paradera mientrastanto ta un contribucion grandi pa esnan cu antes mester a bay un distancia largo pa yega te Playa.