Home Uncategorized Minister di Enseñansa y Famia, Michelle Hooyboer-Winklaar SKOA ta ricibi mas di...

Minister di Enseñansa y Famia, Michelle Hooyboer-Winklaar SKOA ta ricibi mas di 1 miyon florin pa aña pa mantencion di nan propio scolnan

SHARE
????????????????????????????????????

Gobierno kier mas transparencia den SKOA!

 

ORANJESTAD, Aruba: Minister di Enseñansa y Famia, Michelle Hooyboer-Winklaar a bishita Puis X School na Dakota pa atende cu e protesta di docentenan cu ta kehando cu nan ta dunando les den klasnan calor pa motibo cu no tin airco y e bentananan no ta habri. Pe motibo aki pa 2 dia e maestronan no a duna les pasobra nan no kier sigui traha den calor ni pe muchanan sinta den calor.

 

E bentananan di e scol ta relativamente nobo, pero den e ultimo añanan e bentananan a haya algun problema. Na aña 2010 a cambia e bentana y portanan di e scol, pero a resulta cu e calidad ta laga di desea.

 

“Nos tin 83 scol y tin varios scol cu tin e necesidad di renobacion completo. Nos ta papia di scolnan cu ta existi pa 40, 50 y 60 aña y nan ta riba un lista di espera pa por haya fondonan pa renobacion completo”, asina Minister Michelle Hooyboer-Winklaar a duna di conoce.

 

Puis X ta cay den e categoria cu a ricibi diferente trabou (incluso recientemente di un cura nobo cu a costa alrededor di Afl. 300,000) pero pa motibo di falta di mantencion a pone varios problema acumula. Kisas algun aña pasa a cuminsa mira problema cu 1 bentana y par di luna despues otro bentananan a haya problema. Mirando cu no tabatin un plan of intento pa atende cu e problema di biaha via mantencion, a haci cu e fayonan a acumula. Esaki a pone cu awo practicamente casi niun bentana ta habri y Ministerio di Enseñansa ta haya cu e situacion aki ta uno hopi di lamenta.

 

No solamente cu esaki a bira un situacion hopi fastioso pa mayornan, scol y muchanan, pero tambe pe maestronan cu ta para den klas y tur dia ta pone y kita e bentananan. Varios aspecto a hunga un rol y a pone cu e situacion a escala y a trece e situacion di e maestronan. Ministerio di Enseñansa ta mira cu por a evita e problema aki, kisas no completamente, pero sigur cu mantencion manera stipula y conforme e subsidio cu ta aloca pa SKOA. Por a evita e problema aki si na momento a bati bel, SKOA cu tin e responsabilidad pa drecha cosnan mas chikito, a actua.

 

“Ta te aña 2014 Taskforce cu ta resorta bou di DOW a cuminsa asisti scolnan di SKOA, pues prome cu esaki SKOA tabatin e tarea aki completamente den nan man”, Minister Hooyboer-Winklaar a splica.

 

Mantencion chikito, cual esaki lo tabata, ta cay specificamente pe responsabilidad di SKOA y nan ta ricibi fondo pa esaki. Tur aña Ministerio di Enseñansa ta aloca mas di 1 miyon florin den presupuesto di SKOA pa por drecha cosnan chikito, mientras Gobierno ta encarga pe reparacionnan grandi. Minister Hooyboer-Winklaar a scucha nan preocupacion y cu awo esaki a bira un reparacion grandi, pero na momento cu nan a cuminsa daña el a cay bou mantencion chikito y esaki no a tuma luga.

 

 

 

 

 

 

Esaki ta splica awor dicon tin varios otro scol den e mesun situacion aki, unda cu tin cosnan chikito pa drecha. Ta di lamenta cu na luga di atende cu nan y soluciona esaki, SKOA no ta pasa e fondonan pa e scol mes drecha nan fayonan, ni tampoco ta busca hende pa drech’e, sino ta prefera laga e trabou chikito bira grandi pa despues bisa “Ta responsabilidad di Gobierno”.

 

SKOA a aumenta “schoolgeld” di 75 florin pa aña pa 175 florin pa aña, cu ta suma un total di 1.9 miyon florin pa aña. E pregunta clave ta keda, dicon no ta drecha e cosnan chikito na e scolnan anto? Si Gobierno ta paga salario di tur docente na Aruba, si Gobierno mester drecha scolnan cu de facto ta pertenece na SKOA, kico ta e motibo pa tin un fundacion manera SKOA anto den nos sistema di educacion? Ta preguntanan valido cu Minister a indica cu lo manda carta pa Parlamento di Aruba pa haya nan “pensamento” riba e asunto aki pa por trece cambionan pa un structura cu ta funciona debidamente.

 

FIN