Home Uncategorized Evelyn Wever-Croes den reunion na Hulanda : “MEP ta di opinion cu...

Evelyn Wever-Croes den reunion na Hulanda : “MEP ta di opinion cu Aruba mes mester atende su problemanan”

SHARE
DEN HAAG – Lider di MEP Evelyn Wever-Croes ta na Hulanda actualmente pa varios reunion cu parlementonan di Reino.
Aparte di esey lider di MEP ta reuni cu varios persona di e mundo politico na Hulanda y e ambtenaarnan cu ta atende cu temanan di Reino. Meta di e reunionnan aki ta pa mantene un linea di comunicacion habri pa asina trese e preocupacionnan di comunidad di Aruba padilanti.
“Dialuna ultimo mi a reuni cu sr. Richard van Zwol, secretario general di ministerio di Binnenlandse Zaken, e ministerio bou di cual asuntonan di Reino ta cai.  Meta di e reunion ta pa ricibi informacion di gobierno Hulandes tocante palabracionnan existente cu gobierno di Aruba, mirando cu na Aruba mes nos no ta haya e informacion ey. Especialmente pa loke ta trata e tema financiero y e fiansa na interes redusi.
E ultimo rapport di CAFT ta un desafio si pasobra credibilidad di Aruba aki na Hulanda ta practicamente nulo! Durante di e reunion mi a trese e punto di bista di partido MEP un biaha mas padilanti. MEP ta kere den un relacion den Reino a base di madures y respet mutuo.
Madures, pasobra MEP ta di opinion cu Aruba mes mester atende su propio problemanan y bin cu solucion nos mes. Nos no mester bai bati na porta di Hulanda pa cualquier cos. Ta pesey nos a lucha pa nos autonomia y nos a haya nos Status Aparte. Y ta pesey mes MEP ta contra intervencion di Hulanda, pasobra nos mes por. Lamentablemente e realidad ta cu ta e propio gobierno di Mike Eman a hinca nos den e problema aki debi na nan mal maneho.
Respet mutuo, kiermen respeta mi pa mi respeta bo.
Mi mester bisa cu e reunion cu sr. van Zwol a bai bon y mi ta satisfecho cu e informacion cu mi a ricibi” segun Evelyn Wever-Croes.