Home Uncategorized Filial di Departamento di Asuntonan Social a habri oficialmente na MFA Paradera

Filial di Departamento di Asuntonan Social a habri oficialmente na MFA Paradera

SHARE

ORANJESTAD – Filial di Departamento di Asuntonan Social (DAS) a habri oficialmente na MFA Paradera. Den un ceremonia presencia pa e funcionarionan di e departamento como tambe prensa, Minister President Mike Eman hunto cu Minister interino di Asuntonan Social, Angel Bermudez y director interino di DAS, Janine Boekhoudt a corta cinta. E paso aki ta cuadra cu e vision di Gabinete Mike Eman pa ofrece e ciudadano un miho servicio publico y mas cerca di su cas.

Minister Angel Bermudez a felicita directiva y trahadornan di e departamento pero tambe e comunidad di Paradera y bicindario. Mirando e facilidad amplio, moderno y agradabel cu ta conta cune na MFA y su gran cantidad di bishitante, Minister Bermudez a indica cu “esnan cu ta bay ubica akinan lo ta sumamente feliz cu un oficina y un ambiente di trabou nobo, pero tambe dor cu asina por trece e servicio mas cerca di e clientenan.”

Boekhoudt a splica cu e oficina ta operacional for di luna di april ultimo caminda a cuminsa brinda servicio di guia social, mientras cu siguiente luna a cuminsa tambe cu e aspecto di bijstand. E prome ta conta cu tres profesional cual ta consisti di un trahador social, un trahador di bienestar y un trahador pa hubentud. Hunto ta atende cu casonan di problema psico-social, den relacion of cu educacion di yiu. Nan ta obtenibel tur dialuna, diaranson y diabierna durante henter dia.

E seccion di bijstand tin un funcionario cu ta atende cu e mesun tipo di peticion cu ta realisa normalmente na e sede di Playa of San Nicolas. Tin bijstand pa famia, pa persona cu limitacion y pa yiu di criansa. E servicio aki ta obtenibel tur diamars, diaranson y diahuebs. E director interino a splica cu ya caba den e prome lunanan aki, ta atendiendo entre 20 pa 27 cliente pa siman den cada seccion.

Pa Minister President Eman esaki ta otro momento di satisfaccion pa mira con e obhetivo di MFA den bario ta concretatisa. “Cu cada MFA nos ta mira cu loke nos a pone nos dilanti ta birando realidad: servicionan mehora, eficiente y agradabel pa empleadonan y e clientenan den bario. Awe nos ta amplia esaki cu Departamento di Asuntonan Social.”

Premier Eman a yama danki na oficina di maneho di MFA, na Minister Paul Croes kende ta esun cu a inicia e proceso y colega Bermudez cu a complet’e, pero tambe na e propio Departamento di Asuntonan Social cu a brasa e oportunidad aki. Un danki a bay tambe pa Arubus cu ta trahando hunto cu DAS pa facilita transporte na e clientenan cu mester yega MFA Paradera.