Home Uncategorized MEP: Den e aña di campaña pa eleccion 2013 gobierno di AVP...

MEP: Den e aña di campaña pa eleccion 2013 gobierno di AVP a surpasa e presupuesto cu 64.4 miyon florin

SHARE

Pa di tantisimo vez e Colegio di Supervision CAFT a emiti dia 2 di juni 2017 un rapport sumamente devastador pa loke ta e maneho financiero hiba pa Gabinete Eman durante e prome kwartaal di 2017. CAFT a trece entre otro padilanti cu e cifranan di e prome kwartaal 2017 ta hopi preocupante debi na e echo cu e deficit financiero den e prome kwartaal a yega caba na 1.5% di nos GDP, siendo cu gobierno a fiha como meta cu e deficit pa henter 2017 lo mester ta 0.5% di nos GDP. Alavez CAFT tin su dudanan serio cu e norma di 0.5% lo wordo logra pa 2017, ya cu un otro meta, esta e reduccion di e gastonan di personal cu 5% pa aña tampoco a ser logra y e motibo di esaki ta cu e gobierno di AVP a pak su hendenan den servicio di gobierno.

Mester tuma medida

Segun CAFT, si e situacion negativo aki continua, e ora ey den e rapport di ehecucion di e di dos kwartaal 2017, gobierno mester indica cual ta e medidanan cu e lo tuma den e proximo lunanan p’asina compensa e deficit financiero di henter aña. Conhuntamente cu esaki mester introduci un paro general na e gastonan total di gobierno y tambe un paro di tumamento di personal den servicio di gobierno. E situacion aki delinea pa CAFT ta pone Gabinete Eman den un skina cu dificilmente nan lo por sali for di dje, ya cu pa experencia di e forma di hiba campaña di AVP, hustamente den e di dos y tambe den e di tres kwartaal e gobierno aki lo continua cu su racha di derochamento di placa di pueblo. E gobierno di AVP semper ta campeon pa dilanti porta di eleccion gasta mas placa cu e caha di gobierno por carga y esaki ta visto caba mirando cuanto hende cu AVP-diploma a ser emplea durante e ultimo lunanan y tambe cuanto placa nan ta hincando pa mercadea e gobierno derochado aki.

Campaña miyonario di AVP

Un situacion similar por a ser mira tambe den e temporada di eleccion 2013, caminda nan a uza fondonan publico pa campaña y bende e imagen di partido AVP. Asina nos por mira den e Jaarverslag di Controlaria General 2013 con den e presupuesto supletorio 2013 un suma extra di 64.4 miyon florin a ser aproba y p’asina paga pa e campaña miyonario di AVP y esaki riba custia di pueblo. Den e tabel adhunto por mira con e suma di 64.4 miyon florin di “overschrijding” a core den tur e ministerionan di Gabinete Eman.Y manera ta bon conoci caba, nunca partido AVP ta lubida su mal maña y lo haci mescos of pio den 2017 pa loke ta derochamento di placa di pueblo den nan campaña miyonario, anto esaki manera semper riba custia di pagadornan di belasting. Poco poco tur ciudadano den e pais aki lo mester por a comprende caba cu e gobierno di AVP ta sigui cu su filosofia di “après nous le déluge”, esta cu no ta importa nan cu e pais aki sink, basta cu nan y nan compinchinan si keda bon para y e resto di pueblo malogra!