Home Uncategorized Grupo encabesa pa Pep Guardiola ta pidi referendum pa e independencia di...

Grupo encabesa pa Pep Guardiola ta pidi referendum pa e independencia di Catalonia

SHARE

Catalonia ta un di e areanan mas rico di Spaña, e tin 7.5 miyon habitante, tin su mesun lenguahe y tambe cultura. Pa contextualisa e discusion y lucha pa independencia mester informa cu e area di Catalonia a sufri hopi bou di e dictadura di president Francisco Franco, cual tawata na mando di 1936 pa 1975. Tin un historia largo di discriminacion contra e cultura Catalán, pues e lucha pa independencia for di e estado Spaño ta uno logico, sin menciona e aspectonan economico.

Diadomingo, Pep Guardiola, miho conoci como e manager di e equipo di futbol Manchester City, a dirigi palabra na un grupo di casi 45.000 persona. Den su discurso e a pidi pa votadornan tuma parti den e referendum di 1 di october proximo.  “Nos ta bay vota, hasta si e estado Spaño no kier…nos no tin otro salida: e unico manera ta pa bay vota.” Guardiola a splica e multitud.

Pep Guardiola a duna su discurso den Catalán, Spaño y Ingles. Como un persona conoci den e mundo di deporte, Guardiola a pidi tambe pa sosten y ayudo for di e comunidad internacional contra e “abusonan di e estado autoritario”. Segun un sondeo di un instituto gubernamental catalán, mas cu 73% di persona catalan ta na fabor pa un referendum. Tambe tin indicacion cu e grupo di pro y contra ta diferencia na un margin chikito di 48.5% contra independencia y 44.3% na fabor.

Como cu e referendum ta bay contra e decision di e gobierno Spaño y su corte constitucional, no ta sigur si e referendum lo por tuma lugar.