Home Uncategorized Acuerdo a keda firma cu partnernan pa lanta Stichting Geestelijke Gezondheidszorg

Acuerdo a keda firma cu partnernan pa lanta Stichting Geestelijke Gezondheidszorg

SHARE

ORANJESTAD, Aruba – 8 di Juni 2017: Diahuebs dia 8 di Juni 2017 a oficialisa Stichting Geestelijke Gezondheidszorg, unda cu Minister di Salud Publico, Cuido di Nos Grandinan y Deporte, dr. Carlos Alex Schwengle conhuntamente cu AZV y notario a firma e finalisacion di e statuut di e fundacion. E fundacion ta carga e area di cuido pa loke ta trata Salud Mental na Aruba. Den un documento tin skirbi cu pa 40 aña ta purbando na bin cu un structuracion di e cuido den e area di salud aki, awor porfin esaki a bira realidad.

Minister Schwengle tabata presente na un seminario di Salud Mental riba un invitacion y esaki tabata organisa pe famia Ling. E famia tin un fundacion cu ta hopi importante y e mensahe cu nan ta purba crea ta pa kibra e tabu riba enfermedad di salud mental, cual tin diferente sorto manera psicosis, verslaving zorg y hendenan cu tin psicosis. Tambe ta purba crea mas comprension den comunidad cu tin hende cu problemanan mental psikico of psikiatrico y cu mester ta mas tolerante cu nan. Pueblo mester ta mas habri pa e tipo di problemanan aki y no sconde nan. SI na edad jong un hende tin problema mental y no a haya e atencion debido, e problemanan aki hopi biaha ta bira cronico. “Si ta habri cu e problemanan aki y haya e atencion necesario, hopi biaha por resolve e problemanan aki”, Minister Schwengle a indica.

E no ta bay rekeri solamente di un inversion den e cuido na nivel psicologo, psikiatria, enfermeria specialisa, pero e ta bay rekeri di e pueblo tambe. Pueblo mester ta habri y honesto cu e enfermedadnan aki ta existi y no sconde nan, pero pa ta tolerante y no cherche hende pasobra e tin un problema. Esnan cu tin problema di adiccion y nan ta un problema, ta trata nan manera nan no ta existi pa motibo cu nan ta straño y ta un poco agresivo. Tur ta keda humano y mester hiba un maneho hopi humano den comunidad. Fundacion di famia Ling, Fundacion SGG y Minister Schwengle ta apela pa trata tur hende igual.

Aña pasa a lanta e fundacion y awo a concretisa esaki, unda cu a nombra 3 miembro y nan lo busca 2 mas pa e bira un formacion di 5 persona. AZV lo cumpra e cuido mental for di e fundacion aki. Pa por a trece tur trahado di SPD di gobierno y PAAZ  na mesun nivel riba e concepto di e funcion di e fundacion, Ministerio di Salud Publico a papia cu nan y a splica nan cu tur tarea lo cay bou di e Stichting Geestelijke Gezondheidszorg. Lo haci esaki gradual y cu respet pa tur trahado. No lo kita nan derecho y pone tur bou di SGG, pero cu e fundacion aki lo duna e claridad riba ki direccion lo bay. Ta spera cu lo tin un convenio cu e partnernan y e fundacion por cuminsa fisicamente na Januari 2018, unda cu PAAZ lo bay cay bou di SGG. Cosnan no lo bay con cu ta pero mester bin un bon acuerdo, unda cu PAAZ lo pasa pa SGG y tur trahado lo mantene nan derecho y obligacion. Na 2018 nan lo tuma henter e aña pa trece tur claridad, pa bin cu bon plan social y e traspaso definitivo pe fundacion y lo haci esaki conhuntamente cu e trahadonan y nan representante APV.

Esaki ta e prome stapnan y ta bayendo den bon cooperacion. Ta pidi cooperacion y pasenshi na un y tur,  Minister Schwengle a expresa. E fundacion aki ta pa yuda tur cu tin problema di salud mental, pero no mester trata nan den un forma apart pasobra na final tur ta keda ser humano. Un logro grandi sigur cu  despues di 40 aña Minister Alex Schwengle ta logra esaki na bienestar di comunidad Arubano.