Home Uncategorized YMCA ta ofrece lesnan di cushinamento, inscribi awe mes na Dakota of...

YMCA ta ofrece lesnan di cushinamento, inscribi awe mes na Dakota of San Nicolas

SHARE

ORANJESTAD, Aruba – Un biaha mas YMCA lo tin nan les di cushinamento y falta un par di dia pa e curso di cushinamento cuminsa. E lesnan lo ta na YMCA Dakota y YMCA San Nicolas y esunnan cu ta interesa por inscribi awe mes door di yama of pasa na YMCA pa haya mas informacion y inscripcion. Lesnan ta costa solamente Afl. 150 pa persona pe lesnan di cushina ta bin acerca e gastonan di ingrediente.

E interes den cushinamento ta birando mas grandi y ta recomenda tur hende pa inscribi mas pronto posibel. E les di cushinamento di cuminda Chines/Indones lo cuminsa dialuna 12 di Juni y instructor Glenn Ridderstap lo duna esaki, mientras cu diamars 13 di Juni lo tin Pastry/Snacks y instructor Willem Seferina ta duna esaki. E lesnan lo tuma luga 1 biaha pa siman. Na San Nicolas lo tin les di Word y Excel level 2, esakinan ta inicia ariba Diaranson 14 y Diahuebs 15 di Juni.

YMCA Dakota ta situa na Calabasstraat 1 y cu telefon 5823072, mientras cu YMCA San Nicolas ta situa na Pastoor Hendrikstraat 55 y su telefon ta 5845303. Na cada YMCA tin personal presente pa yuda e cursista cu su proceso di inscripcion pa e lesnan.

Young Men’s Christian Association (YMCA) ta funda dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben. Bob Steele a funda YMCA Aruba 61 aña pasa dor di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.

YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 27 aña pasa cu un programa di asistencia cu huiswerk y recreo.