Home Uncategorized Un total di 5 hende muhe a pasa e curso cu exito...

Un total di 5 hende muhe a pasa e curso cu exito Arubaanse Voetbal Bond ta conta cu refereenan nobo Crecemente di futbol ta bay man den man cu aumento den cantidad di Referee

SHARE

ORANJESTAD: E comision di referee hunto cu Arubaanse Voetbal Bond a tene un curso cu a dura 3 luna. Na final por mira atras riba un resultado masha positivo. E comision di referee por conta cu mas referee. Oslin “Oshi” Kock, den su calidad di “Head of referee” tabata contento di mira tanto participacion na e curso aki.

 

E ultimo dia di e curso, e cursistanan a pasa un examen y su tras a ricibi un certificado. Despues di 3 luna trahando cu e cursistanan, e departamento di referee ta contento di mira kico tur a logra. Den e curso aki tabatin hopi referee hoben cu a bin acerca pa incorpora nan mes den e grupo di referee. Durante e dia final di curso tabatin participacion di 9 persona, pasobra mas o menos 6 no tabata por ta presente pa motibo di ta malo of tabata di biahe pero nan lo termina nan examen separa.

 

E biaha aki tin 5 hende muhe cu a participa den e curso. “Na comienso di e curso aki mi a bisa nan cu futbol femenino ta creciendo y nos mester di mas referee femenino”, Oslin Kock a expresa. E hende muhenan mester yega boluntariamente pero e comision di referee ta contento cu e biaha aki nan tin 5 y lo traha cu nan pa asina nan por yega na e nivel desea.

 

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.