Home Uncategorized Un berdadero ehempel di cumplimento, puntualidad y honestidad Theodor Wernet a cumpli...

Un berdadero ehempel di cumplimento, puntualidad y honestidad Theodor Wernet a cumpli 40 aña di servicio

SHARE

Despues di a pasa gran parti di su bida den mundo di refresco, awor e ta traha na New York Laundry

 

ORANJESTAD, Aruba: Theodor Wernet a cumpli 40 aña di servicio fiel y New York Laundry, siendo un subsidiario di MetaCorp, a celebra esaki. Theodor Wernet a cuminsa traha cu Victoria Bottling Company, a pasa pa Tropical Bottling y awor cu New York Laundry (NYL).

 

Theodor Wernet ta un persona hopi agradabel cu tremendo cualidadnan y semper t’ey pa yuda tur hende. E ta un tremendo trahado semper ta cumpli cu su tarea nan, un persona hopi puntual y honesto. Semper ta cla pa yuda su coleganan hasta si esey no ta parti di su trabou, un bon ehempel di “team player”. Un hende cu nunca bo no ta wak e rabia y semper ta duna su sugerencia pa haci e trabou miho. Tur e bunita cualidadnan ki nos mester pa nos mes como colega, trahado y tambe como hende.

 

“E ta un hende hopi amabel. E ta gusta musica. Tin biaha e ta bin cu su mini jukebox y tok’e un tiki, pone un tiki ambiente den e planta”, asina Edwards Jimenez, Operation Manager di NYL a remarca. Un cualidad cu Edwards Jimenez tin di Theodor Wernet ta, cu aunke e no ta sigur si e mester haci e trabou, e ta tuma e iniciativa pa haci esaki.

 

Theodor Wernet ta contento cu su trabou y e ta traha dushi. El a pasa e 40 añanan di servicio hopi dushi y ta haya cu e hefenan ta tremendo. “Mi a pasa e 40 aña hopi bon, sublime y nada di keha”, el a expresa. Si un hende cu kier haci e trabou manera di Theodor Wernet, e trabou no ta duro pero e persona mester gusta e trabou.

 

NYL ta desea Theodor Wernet hopi bendicion y salud. Empleadonan di NYL ta spera di tin Theodor Wernet den servicio pa hopi aña mas, pero tambe como amigo.

 

MetaCorp ta existi desde aña 1920 caba den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den ATCO Concrete Products y Ecotech. Despues di segunda guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi.

 

MetaCorp ta e empresa comercial mas bieu na Aruba y pronto ta cumpli 100 aña. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talentonan manera Eddie de Veer, Robert Carrasquero y Guus Slabbekoorn na cabes di e compania.