Home Uncategorized Segun lider di POR Otmar Oduber: Pueblo ta hopi preocupa Ministerio...

Segun lider di POR Otmar Oduber: Pueblo ta hopi preocupa Ministerio Publico mester investiga negoshi di otorgamento di tereno

SHARE

Comunidad ta preocupa cu e hecho di negoshi cu ta tuma luga cu tereno aki na Aruba a bira un normalidad y  cu e ta un forma di anda di tur dia. POR ta mustra riba e hecho cu nos partido ta para pa cambia e condicionnan pa cual tanto terenonan comercial como terenonan di vivienda ta wordo otorga.

 

Mas o menos 11 mil peticion pa vivienda ainda no a wordo atendi, ta calcula cu algo mas cu mitar di e peticionnan aki a haya un firma di e Minister. Nos sa cu e firma di e Minister aki no tin un balor (loke e mes a bisa) y ta djis un ok pa e departamento cuminsa trata e peticionnan aki. Sinembargo, nos ta mira cu practicamente menos cu mil tereno ta wordo parti ultimo ora, na un forma cucasi bo no tin siguransa cu bo ta keda cu e tereno tampoco y djis pa eleccion ta core otorga y duna opcion riba algun tereno cu bo no ta haye porta ni prome cu eleccion den erfpacht ainda. Corda pa sa si esakinan enberdad ta obtenibel, sr. Oduber a bisa.

 

A tuma nota den medionan di comunicacion cu Minister Sevinger a sali bisa cu “ex colega Minister tambe a pidi varios tereno y a dune”. Otmar Oduber ta reta Minister di Infrastructura pa saca documento di tereno cu a ricibi di gobierno. “Ami no tin niun tereno, niun huurgrond, niun erfpacht. Mi tin un eigendom na mi nomber cu ta mi cas cual keto bay mi ta pagando banco. Den pasado mi a haci peticion pa un huurgrond pa por haci plantacion, nunca mi a haya contesta y tampoco e tereno. Pues si e Minister kier bisa cu mi a haci peticion pa varios tereno y cu el a dunami e terenonan aki, anto e mester sali cu e pruebanan cual ta facil pa e haci como e Minister cu ta otorga tereno y sino, pueblo lo mira cu e ta un mentiroso.”

 

Mester para e fenomeno cu ta conoci publicamente di benta di tereno cu ta tuma luga. A mira hopi documentonan sali den publicidad y a scucha hopi bisa cu esaki ta legal. Si cierto momento e ta legal, instancianan concerni lo mester bay fiha esaki (den e caso aki Ministerio Publico y otronan). “Un cos mi sa sigur ta, cu e ta inmoral loke ta tumando luga unda cu personanan ta haya un tereno pornada for di gobierno y ta bende esaki pa miyones na un tercera persona. Kemen si e ta legal of cu e ta ilegal esey mi ta lage pa e instancianan concerni. Loke si mi ta bisa ta cu e ta un acto inmoral cu un hende ta haya un tereno pa desaroya esaki pa inverti riba dje y crea empleo aki na Aruba, sinembargo ta bende esaki pa enrikese su mes sin cu Pais Aruba ta haya algo a cambio.