Home Uncategorized Prome Minister Mike Eman: “Nos ta bay planta mata di fruta local...

Prome Minister Mike Eman: “Nos ta bay planta mata di fruta local riba ruta di Green Corridor”

SHARE

ORANJESTAD – “Aki por tin mango, kenepa, shimarucu… tur nos frutanan local,” asina Minister President Mike Eman a bisa expresando su deseo pa traha hunto cu Santa Rosa y planta matanan riba e ruta di ‘Green Corridor’. Premier Eman a indica cu ta un idea cu kier incorpora den e proyecto di e caminda grandi di Oranjestad pa San Nicolas pa dun’e un dimension adicional.

E anuncio ey a bin na comienso di e siman aki ora cu Gabiente Mike Eman a informa cu trabou a cuminsa pa un canal di bicicleta di 10 kilometer entre aeropuerto y Savaneta. Como titular di Agricultura, Cria y Pesca, Premier Eman ta traha den forma estrecho cu Santa Rosa y a puntra e departamento pa traha hunto cu DOW y planta matanan di fruta local a lo largo di e trayecto di e canal di bicicleta, pero tambe na otro varios otro punto di Green Corridor.

Asina, segun Premier Eman, “ta bira un berdadero momento di recreo sano, banda di e deportistanan cu lo haci uso di dje  pa tur tipo di competencia.” E caminda di bicicleta ta conta cu tur facilidad necesario; e ta asfalta, tin iluminacion y ta brinda siguridad na e ciclista ya cu e ta na un distancia for di caminda grandi di auto y separa pa vangrail. “Esaki ta algo nunca bisto na Aruba,” Prome Minister Eman a indica.

‘Green Corridor’, riba su mes, ta un proyecto cu for di su creacion, a tene cuenta cu hopi aspecto basa riba e vision di Gabinete Mike Eman cu infrastructura di un pais no mester sirbi solamente automobilistanan, pero e ciudadano tambe. Den su diseño, e proyecto ta conta cu desaroyo total di e area publico dilanti di casnan caminda e ta pasa, brindando trottoir, caminda paralelo asfalta, vegetacion y tambe areanan di parke di recreacion.