Home Uncategorized Na anuncio di proyecto di caminda special pa ciclismo Minister Sevinger: Aruba...

Na anuncio di proyecto di caminda special pa ciclismo Minister Sevinger: Aruba ta bay haya un bunita caminda di 10 km pa practica ciclismo

SHARE

ORANJESTAD – Minister di Infrastructura Benny sevinger ta hopi contento cu Prome Minister Mike Eman a insisti pa construccion di un via special di 10 km pa ciudadanonan haya mas area pa cana y practica ciclismo cu ta na bienestar di salud di e poblacion.

E caminda special pa bicicleta ta cuminsa net banda di e rotonde grandidi Ser’o Teisjie, den e vegetacion. Por mira cu ta trahando riba e caminda aki cu ta permiti tanto personanan cu bicicleta como na pia haci uzo di e via cu ta uno ilumina. E ta un via, Minister Sevinger a bisa, cu por wordo uza tanto door di esnan cu ta recrea of cu ta practica ciclismo. “E ta un proyecto importante pa nos salud, pa esnan cu kier recrea riba un area di 10 km riba ‘Green Corridor’. E ta mas largo, ora e wordo conecta riba Watty Vos Boulevard, cu ta pasa rond di Oranjestad, cu ta encera otro 8 km. Si bo conect’e riba Linear Park, banda di aeropuerto, e ta yega te na Faro, ora cu e ta completamente cla y ta encera mas di 25 km straight cu por wordo cori di un punto pa otro. Tambe e por wordo conecta cu San Nicolas y por yega te na 30 km.”

E proyecto aki, e mandatario a bisa, ta uno hopi importante pa stimula mobilidad di ciclismo na Aruba, alabes brindando esnan cu ta practica e deporte aki mas siguridad den nan movecion. Esaki pasobra e caminda ta separa di unda automobilistanan ta move.

Gabinete Mike Eman I y II a construi e proyecto di Linear Park, cu ta consisti di diferente fase. Un di e partinan cu a wordo agrega, ta e parti na Pos Chiquito, na e brug cu ta bay wordo saca for di uzo, pa permiti ciudadanonan di e area ey bay ariba tambe por tin acceso na un espacio cerca unda nan por cana of core pa mantene nan curpa den condicion.

Minister Sevinger, su mes, ta un persona cu ta practica ciclismo y continuamente ta encurasha personanan rond di dje y e pueblo en general pa haci uzo di Aruba su espacionan publico pa mantene curpa saludabel. Den cuadro di e proyecto aki ODINSA, e compania Colombia cu ta ehecutando e proyecto di Green Corridor, a informa Gobierno cu nan ta bay regala 1000 bicicleta na muchanan di Aruba na momento cu nan entrega e proyecto aki den luna di augustus awor. El a gradici Santa Rosa cu ta bay pone hopi mata di fruta riba e ruta aki, manera Gobierno a pidi.