Home Uncategorized Mester haci algun cambio na KIA pa e por funciona miho

Mester haci algun cambio na KIA pa e por funciona miho

SHARE

Docente di Universidad Central di Florida, Thomas Baker

ORANJESTAD, Aruba: Den cuadro di e plan di maneho di KIA y nan “opleidings plan” a sera un convenio cu Universidad Central di Florida caminda cu professornan di e facultad di “criminal justice” ta ofrece training pa e trahador nan di KIA. E professor Mericano di Universidad Central di Florida, Thomas Baker, hunto cu dos otro colega ta duna e curso na e cuidadonan di preso y esaki ta pa nan por actualisa nan conocemento.

 

A dialoga riba diferente topico y a duna un training na managernan y na e supervisornan. E docentenan a splica nan con pa compronde riba e forma di acercamento con pa haci KIA un miho luga pa tur hende. “E curso, cu ta dura 2 siman, ta consisti di tres topico, cu ta elabora riba etica y integridad, liderazgo y communicashon cu e presonan”, Thomas Baker a remarca.

 

Cada klas tin mas o menos 25 persona y nan ta purba di yuda tur. Nan tin un par di dia caba ta dunando e cursonan. E prome dia a bay bon unda cu a comparti diferente idea den ambos banda. “Nos a siña un tiki di KIA y Aruba y nos a comparti un tiki riba nos perspectiva pa haci KIA miho pa tur hende”, el a expresa. Tin cosnan cu cada prizon tin den comun, unda cu e cuidadonan di preso tin mesun problemanan. Pero tin diferencianan chikito unda cu Merca ta diferente cu Aruba. “Nos ta mira hopi cos y mester algun cambio pa asina e ta un bon luga”, Thomas Baker a expresa.

 

“Nos ta akinan specialmente pe desaroyo di detenidonan”, asina Trahado Social y Relacionista Publico di KIA, esta Consuela Cameron, a remarca. E desaroyo aki ta algo hopi importante di cual ta yuda tambe e personanan ehecuta nan tareanan. Pero tambe pa nan duna un poco mas di loke nan a siña, pero adicional ta e ta duna bo un momento di reflexion abo como persona, abo como profesional.

 

KIA ta hopi contento cu e colaboracion cu nan ta ricibiendo pe formacion aki y e ta di suma esencia. “Hopi biaha nos ta lubida e desaroyo. Nos ta enfoca solamente riba e tarea cu tin”, Consuela Cameron a remarca. Pero e desaroyo mester keda riba un base continuo y esey ta loke nan ta ricibiendo actualmente, den cooperacion cu diferente instancia local y tambe internacional cu tin nan influencia.

Tin diferente grupo cu ta participa na esaki y tur ta varia den diferente profesion y diferente disciplina.

 

Actualmente tin lesnan di maneho, lesnan tocante disciplina, moralidad cu ta ehecuta, etica cu mester tin pa trabou, tambe comunicacion cu e cliente. Eseynan ta training/lezing cu tur persona ta ricibiendo actualmente. “Nos ta hopi contento cu e cooperacion cu nos tin cu universidad central di Florida cu nan ta brinda nos e aspecto aki. E ta un rosea fresco, pasobra nan tin otro forma di mira y ta yuda nos tambe recapacita un rato riba kico nos ta haciendo actualmente”, Consuela Cameron a remarca.

 

Korrectie Instituut Aruba, KIA a muda pa su localidad na Santo di Patia na San Nicolas dia 22 di september 1990, pues 26 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.