Home Uncategorized Den controlnan preventivo “Landloperij” ta un di e molesternan mas grandi cu...

Den controlnan preventivo “Landloperij” ta un di e molesternan mas grandi cu Visibility Team ta topa cune na Oranjestad

SHARE

ORANJESTAD: Visibility Team, e division di Cuerpo Policial encarga cu supervision y controlnan entre otro den centro di Oranjestad y vecindario ta patruya entre otro na e salida di waf di crucero y ex-waf di fruta, den centro di ciudad, e area di Arubus y riba e ruta di Arutram, y Linear Park, for di Rotonde Wichi de Palm te na Surfside Beach.

For di dia 22 di mei pa dia 31 di mei e molester mas grandi cu nan e topa cune, segun resumen di e siman di trabao, ta “landloperij”, esta personanan cu ta biba un estilo di bida bagamundo, sin adres, sin profesion of trabao y sin ingreso.

Riba dia 22 di mei a topa cu e bagamundo “F”, a papia cune y core cune for di e area di Royal Plaza Mall. E ta sospechoso den diferente ladronicia cu a tuma luga den centro di Oranjestad.

E siguiente dia Visibility Team a topa banda di Prikichi Supermarket cu e bagamundo “M”, kende tabata canando riba caya ta zwaai un martiu. Visibility Team a tuma e martiu den beslag.

Ademas di patruya den centro di Oranjestad, considerando cu e benta di dia di Lotto lo ta mas halto  como cu e Mini Mega a surpasa 1 miyon florin, a patruya tambe den bisindario di diferente casita di Lotto. Tabata hopi druk, pero no tabatin ningun incidente.

Riba dia 24 di mei algun miembro di e team a patruya riba bicicleta riba L.G. Smith Boulevard for di e oficina di Visibility Team te na Aruba Ports Authority; tambe den Weststraat y e negoshinan na waf, e station di Arubus, Caya Betico Croes, Havenstraat, y bisindario.

A topa cu a bagamundo “G” molestiando turistanan den Havenstraat. A papia cune y core cune for di e area.

Despues cu a ricibi melding di un homber desconoci actuando straño, cu un handschoen blanco bisti banda di Island Finance y CMB Bank, polisnan a busca den e area pero no a haya e persona. A keda patruya te cu tiendanan y negoshinan na waf a cera.

Durante di controlnan a duna dos chauffeur boet pa core den direccion prohibi na Paardenbaaistraat/Arubus.

Diahuebs Visibility Team a pone un team di patruya na a entrada di waf pa prevencion di molester di turistanan bishitando cu barco crucero, y a patruya tambe den e resto di centro di ciudad.

A topa cu e bagamundo “J” labando un auto banda di unda antes tabata The Music Box; a papia cune y core cune for di e area.

Riba dia 26 di mei a Visibility Team a haci control di trafico, cerca di edificio di Parlamento, unda cu nan a duna seis proces-verbaal. Tambe a patruya na pia den centro di ciudad.

E dos siguiente dianan, Visibility Team a patruya den bisindario di Aruba Soul Beach Music Festival, un evento hopi bon bishita, y riba dia 29 di mei a haci un biaha mas controlnan di trafico. A duna cinco proces-verbaal pa coremento sin faha di siguridad y falta di respet di reglanan di zebrapad.

Dia 30 di mei a patruya den e area conoci y a para na salida di Aruba Ports Authority. Tambe a duna asistencia na Fruteria Virgilio unda cu e doño a splica cu e bagamundo “D.K.” tabata molestiando su clientenan. No a topa cune den e area.

Ademas mester a duna asistencia pa cu e presencia di e bagamundo “R” cerca di The Paddock; a core cune for di e luga.

Un biaha mas, como e premio di Mini Mega a sigui crece, a controla preventivamente tambe den bisindario di e casitanan di Lotto.

Riba dia 31 di mei un team di Visibility Team a para na e salida di waf y otronan a patruya entre otro na pia den centro di Oranjestad.

E unico incidente e dia aki tabata un encuentro cu e bagamundo “R”, kende tabata canando den direccion di Aruba Ports Authority. A intercept’e, papia cune y core cune for di e area.