Home Uncategorized Minister Suzy Camelia-Römer di Corsou a participa na HCCA 2017 Mas cu...

Minister Suzy Camelia-Römer di Corsou a participa na HCCA 2017 Mas cu cuido integral lo traha riba bienestar di ciudadanonan

SHARE

Salud integral ta encera mas cu salubridad so

 

ORANJESTAD, Aruba: Probablemente e ta un di e prome biahenan di trabou cu Suzy Camelia-Römer ta haci como Minister di Salubridad Publico, Medio Ambiente y Naturalesa di e Gobierno nobo di Corsou cu apenas a huramenta dialuna ultimo dia 29 di mei 2017. El a participa activamente durante e di dos Health Care Conference Aruba den cual a enfoca riba cuido integral. E no tabata e unico Minister di Salud Publico presente, pasobra Sint Maarten tambe a participa den forma activo na e conferencia aki.

 

“Na Corsou nos ta kere sigur den un cuido integral caminda no solamente actornan di cuido, kiermen e nursenan, e dokternan, e specialistanan, dietistanan, ta traha hunto sino cu tur mester traha integral pa cuida e pashent. Nos ta bay tambe riba e parti di cuminda cu e pashent ta come, e aspecto di e cultura di comemento, pasobra den nos vision nos ta mira un hende salud”, asina e mandatario a expresa.

 

El a sigui splica cu “Pesey mi cartera yama Salubridad Publico, Medio Ambiente y Naturalesa, pues nos ta traha pa tin un comunidad salud, tanto mentalmente, fisicamente y cu bon ambiente di bida, bon balansa y ta pesey nos lo inverti, hunto cu varios coleganan manera di Asuntonan Social y di Infrastructura. Pasobra si kier traha riba e problema di obesidad na Corsou, cu ta un di e problemanan di mas grandi  den cuido medico, tanto for di e dokter te na e dietista, ta importante pa e pueblo move. Pero pa comunidad por ta mas activa den movecion, mester tin caminda, mester tin infrastructura pa cana riba dje. Mi mes tabata Minister di Infrastructura, mi a cuminsa cu esey caba, trahando riba caminda pa core bicicleta, nos a traha acera banda di caminda pa hende cana riba dje, pasobra di masha tempo nos no tabata traha acera mas na Corsou. E cosnan ey tur ta bay hunto”.

 

Minister Camelia-Römer a enfatisa cu den e parti di agricultura ta enfoca pa publico planta mas na cas pa por come mas saludabel. Berdura por ehempel ta masha caro, pero un hende cu diabetes of pa un hende cu kier evita di bira gordo pa e no bira pashent di diabetes, e mester come mas berdura. “Kiermen asina nos ta mire como un maneho integral, tanto pa e parti medico, como tambe tur otro facetanan di bida cu tin rond di e hende”.

 

Den e acuerdo di Gobernacion di Corsou, a enfoca riba “wellness”, kiermen e punto di salida di e Ministerio di Salubridad Publico no ta enfermedad, tampoco absencia di enfermedad, sino mas bien e ta enfoca riba bienestar di e hende.

 

“E parti di prevencion ta sumamente importante, specialmente si tuma prevencion como parti di cambio di estilo di bida.  For di ora cu nos tin un baby y e ta yora, no por keda dune formula of lechi te ora e stop di yora, no….mester siñe for di chikito te cierto comemento ta basta. Mi ta stress riba esey pasobra nos sa cu e ta un problema di cultura”, asina Minister Camelia-Römer a bisa despues di a presenta durante HCCA Aruba.

 

El a subraya e hecho cu “Mi mes tambe lo bay baha peso pa duna e bon ehempel, pasobra Bo por no por tin sobrepeso bo mes y bo ta bisa otro hende pa nan baha peso, pues mi ta start un programa pa nos baha hunto y pa nos tur ta mas consciente locual nos ta duna nos yiunan pa come, siña nan con cuida contra obesidad, cuida pa nos bira diabetico, presion halto, etc. Ora haci e tipo di cosnan asina e bienestar di e mucha ta mas miho, e ta studia miho, e ta traha miho, mas productividad y lo ta un beneficio pa e ciudadano mes, pa e biba cu mas placer den bida. Nos meta den bida ta pa ta feliz pues e aspectonan aki tur ta contribui pa ta feliz y pa funciona miho den trabou. Economia ta crece, bo ta haya un manera di bida hopi mas miho”.

 

Na final Minister Suzy Camelia-Römer a comenta cu e ta consciente si cu e no ta un programa di 4 aña of 8 aña, sino ta un programa cu lo mester traha cu otro pa sigur un 20 aña, pero bo tin cu cuminsa pa Bo por realise. Nos lo bay traha den barionan, hunto cu coleganan Minister riba e otro aspectonan pa hunto logra un salud integral.