Home Uncategorized E campaña di manipulacion di AVP ta sigui! E debenan total, incluso...

E campaña di manipulacion di AVP ta sigui! E debenan total, incluso e debenan PPP cu AVP a crea desde 1986 ta mas di 5.2 biyon florin

SHARE

Awor cu e fecha di eleccion di 22 di September ta acercando por mira cu AVP ta intensificando su campaña di manipulacion y mentira contra MEP. Den e ultimo dianan aki via medionan social nan a cuminsa lansa e mentira cu di tur e debenan (incluyendo e debenan di e proyectonan PPP) di mas cu 6 biyon florin, 3 biyon florin a ser crea door di MEP. Treciendo e mentira aki padilanti nan kier pa MEP comparti y carga un gran parti di e Megadebe, siendo cu MEP no tin arte ni parte di e desaster financiero cu AVP a crea durante e ultimo 8 añanan. Pa contradeci e mentira y preveni cu esaki lo hiba su propio bida, MEP ta presenta e tabel adhunto compila di cifranan oficial di Banco Central caminda un y tur por mira cu e unico culpabel pa e desaster financiero y destruccion di nos pais ta Gabinete Eman y AVP.

 

Debenan total y debenan PPP

Nos por mira cu durante Gabinete Henny Eman (1986-1988) nos debe nacional a ser aumenta cu 617 miyon florin. Siguientemente Gabinete Nelson Oduber (1989 -1993) a aumenta e debe cu 460.8 miyon florin, Gabinete Henny Eman (1994-2001) a aumenta e debe cu 426.9 miyon, Gabinete Nelson Oduber (2002-2009) a aumenta nos debe cu 725.4 miyon florin y finalmente Gabinete Mike Eman (2010-2016) a aumenta nos debe nacional cu 1942 miyon florin. Mester remarca si cu pa gran parti e debe di 725.4 miyon florin (2002-2009) tabata pa paga e proyectonan fantasma di SACE, Race Track, Radar, Fondo Desaroyo SN etc. cu Gabinete Henny Eman a laga atras na 2001!

Acerca ta bin e debenan di e proyectonan PPP (Hospital, Green Corridor, Watty Vos Blvd y e 5 MFA-nan) cu Gabinete Mike Eman a crea di mas cu 2 biyon florin cu ta “off balance”, pero cu pueblo lo mester paga esaki durante e proximo 25 pa 30 añanan.

 

Ansha y desesperacion

Recapitulando tur e debenan menciona, e suma total di debe cu e gobiernonan di AVP a crea desde 1986 ta 5185.9 miyon florin, esta di 5.2 Biyon florin. E gobiernonan di MEP a crea desde 1986 un suma total na debe di 1186.2 miyon florin, esta di 1.2 Biyon florin. Esaki ta mustra claramente cu e debenan crea door di AVP ta mas cu 4 biaha cu locual MEP a crea desde 1986 en adelante. Increibel con AVP por a hinca nos pais den e abismo financiero aki y cu tur e debenan aki lo mester bay wordo pa nos yiunan y yiu di nos yiunan! Pues e cifra manipulativo di 3 Biyon florin na debe cu gobierno di MEP lo a crea ta basa riba mentira flagrante di parti di AVP cu no por wordo substancia cu cifranan concreto, manera cu semper MEP si ta haci. Esaki ta demostra un biaha mas cu AVP ultimamente ta den un ansha y desesperacion total ya cu cada bez nan tin cu recuri na cifranan manipulativo y mentiroso y p’asina pinta MEP malo den comunidad.