Home Uncategorized Drs. Jerry Staring, Director di Departamento di Salud Publico di Aruba Tur...

Drs. Jerry Staring, Director di Departamento di Salud Publico di Aruba Tur dia mi ta aplica mi estudio como enfermero den mi trabou

SHARE

Durante tayer pa studiantenan

 

ORANJESTAD, Aruba: Health Care Conference Aruba 2017 a inclui tambe un tayer na studiantenan, den cual mas o menos 200 studiante e haya un bon oportunidad pa scucha di expertonan, di nursenan profesional, con e estudio aki a yuda nan desaroya den nan bida. Un di e oradornan tabata Drs. Jerry Staring, apunta recientemente como Director di Departamento di Salud Publico di Aruba (DVG) y kende a studia enfermeria.

 

“Mi a splica studiantenan cu traha den cuido no ta encera solamente di ta banda di cama di un pashent, cu tin hopi caminda pa cana den cuido”, asina Drs. Jerry Staring a conta nos despues di a dirigi su mes na un sala yena di studiantenan entusiasma pa scucha mas di enfermeria, di cuido y di e opcionnan cu tin pa desaroya y sigui crece den e ramo aki.

 

Drs. Jerry Staring ta un nurse profesional cu den su bida a traha cu pashentnan y cu awendia ta Director di Departamento di Salud Publico di Aruba. E no ta e unico ehempel, pasobra si mira cu e director di Dr. Horacio E. Oduber Hospitaal, Ezzard Cilié, tambe ta un nurse profesional, e director di Wit Gele Kruis y alabes Presidente di Hunta di Supervision di Dr. Horacio E. Oduber Hospitaal, Gino Goeloe, tambe ta un nurse y hasta nos tin un Minister, mr. Drs. Arthur Dowers, cu tambe a studia enfermeria, pues a splica e studiantenan cu siendo enfermero bo por desaroya y innova y yega na cualkier funcion den comunidad.

 

E estudio ni e trabou di nurse no ta facil, pero Jerry Staring a splica e studiantenan cu tur locual el a studia y a gana na experencia como nurse den su bida, e ta aplica tur dia durante su trabou. E estudio di enfermero ta hopi amplio, no ta siña asina hopi pa conoce hende, siña conoce e realidad di e hende, e ta un carera cu ta haci Bo un profesional, e ta desaroya Bo como hende y siña Bo conoce y mira bida na un forma diferente.

 

E conferemcia di HCCA 2017 a cuminsa diahuebs y a termina diadomingo cu un participacion grandi, no solamente di Aruba sino tambe di islanan den region. A enfoca riba cuido integral y entre e participantenan tabatin mandatarionan, tabatin profesionalnan medico, profesionalnan den enfermeria, tur cu ta traha den cuido y hasta studiantenan cu tin interes pa un dia studia den e materia aki.