Home Uncategorized Joselin Croes (POR): “Nunca Aruba a yega di mira un partido politico...

Joselin Croes (POR): “Nunca Aruba a yega di mira un partido politico pone tanto importancia riba un “Green Aruba” manera e AVP di Sr. Mike Eman”

SHARE

Hopi hoben 8 aña pasa a vota pa AVP pasobra e partido a hiba un campaña fuerte pa un Green Aruba. Un Aruba na unda nos flora y fauna lo a wordo protehi, un Aruba na unda nos lo bai over riba green energy y stop uso di “Fossil Fuels”, un Aruba na unda nos casnan lo bai over riba solar panels.

Durante e ultimo 7 añanan y pico nos por a mira gobierno gasta miyones na Green Conference pa atrae inversionistanan di afor, a trece astronaut Aruba, a trece Sir Richard Branson, a duna discurso elocuente den un sin fin di pais rond mundo y hasta a gana premio pa e palabranan bunita.

En berdad nos por a mira varios proyecto di solar panels wordo implementa, incluyendo uno basta grandi na aeropuerto.

A anuncia tambe algun aña pasa cu lo bini un parke di Molina na costa serca di Alto Vista, pero esey parce di a tranca, y recientemente nos tur a mira bunita portret di yen di Minister hunto cu Sr. Branson cu shovel yen di santo den nan man.

En berdad e palabranan tabata bunita, e discursonan tabata elocuente, y e portretnan tabata masha colorido. Pero kico en realidad a sosode na Aruba durante e ultimo añanan?

E proyecto di dump di parkietenbos lo a wordo soluciona, pero e ta mes malo of pio. Y na mes momento dumpnan illegal a wordo crea rond di nos pais, cada un di nan un estorbo pa e bisiñanan y un menaza pa nan salud.

Pa nos futuro economico gabinete Mike Eman ta enfocando principalmente riba exploracion di petroleo y gas dilanti nos beachnan y reapertura di un refineria bieu cu lo mester wordo opera pa un empresa esencialmente bancarota cu ta wordo controla door di un regimen dictatorial y abusive. Hustamente e siman aki nos a experiencia e daño substancial cu un oil spill chikito cu a sosode na Trinidad por causa.

Riba dje a exonera Valero di su responsabilidad pa hasi tereno di refineria limpi. Esaki tin como consecuencia cu si mayan e deal di CITGO cay na awa ta Aruba (lesa: Pagador di Belasting) mester bai paga pa limpia e tereno toxico na Sero Colorado.

Bou di e maneho “Green” di e AVP di Mike Eman nos por a mira Minister duna tereno destina como natuurgebied na amigonan pa wordo desaroya, nos a mira un area precioso manera Rooi Frances wordo destrui esencialmente pa capricho, nos por a mira terenonan grandisimo wordo rosa por completo pa traha un “Smart Community”, nos por a mira extranhero destrui areanan di mangel pa drecha su bista pa laman sin ningun consecuencia pa e persona aki. Asina tin un sin fin di ehempel con e hechonan no ta cuadra cu tur e promesanan y tur e elocuencia.

Ora cu nan mester a opta pa proteha nos flora y fauna, nan a dicidi regala tur tereno, mata, flor na inversionistanan amigonan pa laga nan destrui, kap y mata nos flora y fauna sin bin cu un maneho estricto di construccion cu proteccion di nos naturalesa.
Durante e ultimo añanan a permiti nos coneu, nos prikichi, nos shoco y nos patrishi yega na borde di extincion sin a duna NINGUN indicacion cu a purba scapa nan (p.e pa medio di captive breeding programs).

Aruba: No laga bo mes wordo engaña atrobe. Dia 22 di September vota conciente.