Home Uncategorized EVELYN WEVER-CROES: NOS COMPROMISO CU PARADERA

EVELYN WEVER-CROES: NOS COMPROMISO CU PARADERA

SHARE

CENTRO MEDICO DEN AREA DI PARADERA / SANTA CRUZ

STA. CRUZ –Den fin di siman lider di MEP Evelyn Wever-Croes hunto cu demas coleganan a bishita e bario den Paradera, y mester bisa cu Paradera a ricibi Evelyn na forma hopi caluroso. Ta manera cu e hendenan tabata spera su bishita, y a prepara p’e.  Entre tur e candidatonan, nan a bishita mas di 1000 cas, un record den campaña!

“Mi kier gradisi e pueblo di Paradera pa a ricibi nos asina calurosamente, y mesora pidi mi disculpa na esnan cu mi no a logra bishita ainda. Tin 110 dia ainda nos dilanti, y mi compromiso ta pa yega na mas hopi cas cu ta posible.

CENTRO MEDICO DEN PARADERA/SANTA CRUZ

Cumpliendo cu e deseo den Paradera, nos lo percura pa trese e cuido di salud mas serca di e pacient, especialmente den e area central di nos isla, Paradera y Santa cruz. Pasobra awor ta un caminda di cruz pa e pacient yega na e cuido medico. Ohala cu nos por traha centronan medico den cada districto, pero mirando e situacion financiero actual, esaki lo ta dificil. Sinembargo, un centro medico adicional na Aruba, si ta posibel, y esaki lo bin den e area central di Aruba, den vecindario di Paradera/ Santa Cruz. Pa por logra esaki financieramente, e gobierno di MEP lo fiha prioridadnan diferente cu e gobierno actual. Nos lo pone e prioridad na e ser humano. Si awor tin asina tanto miyon pa construi careteranan, nos lo percura pa tin e placa disponible pa e centro medico, cu ta mucho mas necesario cu careteranan.

Ademas esaki lo crea mas cupo di empleo pa nos hendenan cu awor ta desemplea. Nos hobennan cu ta studia na EPI, lo nos percura pa haya trabou mesora den salubridad y cuido. Nos profesionalnan, nos lo trese nan bek di exterior y brinda nan oportunidad den e sector di salud.

PARADERA CLA P’E CAMBIO

E habitantenan di Paradera a expresa cu nos cu ya ta basta di e rumbo cu nos pais ta aden. Criminalidad y ladronicia tin tur hende fada. Sin conta mes di e corupcion den dia cla den e gobierno aki, cu tereno y permiso di trabou. Mientras cu cuidadanonan humilde di nos pais mester warda hopi aña pa haya un pida tereno, esnan rond di Mike Eman ta bendiendo tur tereno di pueblo, y hasiendo ganashinan miyonario. Pueblo a fada di esaki, y kier mira un cambio, y nos compromiso ta pa brinda e cambio aki.

Cu poder di Dios nos lo logra cambia rumbo di nos pais, y pon’e bek riba e rumbo di progreso y bienestar pa un y tur riba nos dushi Aruba”, lider di MEP a duna di conose.