Home Uncategorized SV Dakota a haya 9 bombio nobo pa nan veld Cu ayudo...

SV Dakota a haya 9 bombio nobo pa nan veld Cu ayudo di CONCACAF ta yuda ilumina e veldnan miho

SHARE

ORANJESTAD, Aruba – Diamars atardi Centro di Bario Dakota a haya bombionan nobo pe veld pe team di futbol di Dakota. Pa por a haya e luznan aki Arubaanse Voetbal Bond a delibera hopi cu CONCACAF riba e necesidadnan cu e clubnan tin aki na Aruba. Basa riba e bon relacion cu AVB tin cu e Presidente di CONCACAF, AVB tabatin e primicia di entrega 9 bombio na e organisacion di SV Dakota. Minister di Husticia, drs. Arthur Dowers tambe tabata presente pa asina sostene e proyecto aki.

 

“CONCACAF a yuda nos pa yuda e club pa nan por cambia e bombionan pa nan por tin un miho iluminacion, pa asina e team por train mas miho y mas iluminacion. Esaki ta basa riba e bon relacion cu nos tin cu CONCACAF”, Presidente di AVB, Ing. Richard Dijkhoff a remarca. Esaki ta algo cu AVB tin ta haciendo pa basta tempo y awo ta mira e frutonan. Na momento cu AVB a acerca nan y splicando nan riba e necesidad cu tin na Aruba pa loke ta e cambionan di bombio, di biaha e Presidente a duna instruccion pa yuda Aruba cu e caso aki.

 

AVB tin diferente club cu ta bin na remarca pa cambia e bombionan. Dakota tabatin e primicia mirando e bon trabou cu Dakota ta bin ta haciendo,unda cu AVB a entrega e 9 bombio na e president di SV Dakota. Despues di Dakota, esnan cu mester haya lo ta Riverplate, Bubali, SV Estrella, La Fama y asina aki AVB lo pasa na e clubnan pero e ta basa riba un schedule.

 

“Awe nos a inicia, pero segun nos haya bon cooperacion di gobierno den e caso aki, esey tambe ta ilustra e bon cooperacion cu gobierno. Un ehempel ta AVB como federacion a entrega e bombionan y Minister di su banda ta coopera cu e mundo di deporte cu e Hoogwerker di Brandweer, asina aki hunto nos ta trahando na desaroyo y bienestar di futbol”, Richard Dijkhoff a remarca.

 

Presidente di AVB ta corda cu na momento cu el a inicia trayecto pa drecha relacion cu Gobierno, hopi hende a bis’e pe dedica atencion na e clubnan. Pero AVB a opta pa cana ambos trayecto pareu. Sin e cooperacion cu e stakeholdernan e lo bira dificil, pasobra nan so no por haci tur cos. AVB a percura pe bombionan, Minister a pone di su parti y e club ta ricibi loke cu e mester.

 

Minister Dowers tabata sumamente contento di mira un animo na e muchanan pasobra e veld tabatin luznan nobo. Cuerpo di bombero tabata presente cu nan material pa asina yuda cambia e luznan. “Nos tin un responsabilidad banda di e trabou cu nos ta di siguridad, tambe un aspecto social y a cumpli cu esaki den diferente proyecto”, Minister mr. Drs. Arthur Dowers a remarca. Ministerio di Husticia a compromete nan mes pa coopera cu e otro clubnan tambe, pasobra unda por tene e muchanan na practica deporte y haci algo sano, esey ta contribui na e trabou cu nan tin cu haci di prevencion cu cosnan ta bay fout. Minister tabata contento di por a topa cu coachnan di Dakota.

 

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.